ځايي پولیسو انادولو خبري اژانس ته ویلي، چې د شپې پر مهال یو بریدګر د چاودېدونکو توکو ډک موټر سره  هڅه کوله چې د پولیسو مرکز ته ننوځي.

پولیسو سمدلاسه مداخله وکړه خو، بریدګر په موټر کې ځای پر ځای شوي چاودېدونکي توکي والوزول، چې له امله یې دروازې او دېوالونه زیانمن شول.

په دغه برید کې ۸ تنو پولیسو او یو تن ملکي وګړي په ګډون ۹ تنو ژوند د لاسه ورکړی او لږ تر لږه ۳۵ تنه نور ټپيان شوي دي.

د برید پړه تر اوسه چا پر غاړه نه ده اخیستې.

د پاکستان د ترهګرۍ ستونزه

په پاکستان کې وسله وال بریدونه، په ځانګړې توګه په خیبر پښتونخوا او بلوچستان ایالتونو کې ډېر شوي دي.

په دواړو ایالتونو کې هغه وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه کوي.

اسلام اباد ادعا کوي چې پاکستاني طالبان (TTP) په افغانستان کې ځای پر ځای شوي او له هغه ځایه خپل بریدونه تنظیموي، خو افغان حکومت دا ادعاوې ردوي.

په بلوچستان کې بیا د بلوچستان د ازادۍ پوځ  بریدونه ډېر کړي  دي..

دا بیلتون غوښتونکې ډله غواړي چې بلوچستان ایالت له پاکستانه جلا شي او بلوڅان پر دغې سیمې واکمن شي.