تېره میاشت هم د تهران په "انقلاب" میدان کې یو پوسټر ځړول شوی و چې ټرمپ پکې په تابوت کې پروت انځور شوی و.
د ایران په پلازمېنه تهران کې په یوه سیمه کې یو لوی پوسټر لګول شوی چې د امریکا ولسمشر ډونالډ ټرمپ پکې انځور شوی او پرې لیکل شوي چې "انتقام حتمي دی".
دغه لوی پوسټر چې د "جمهوري" او "ولي عصر" واټونو په یو ځای کېدونکې نقطه (څلورلاره) کې ځړول شوی، پکې داسې لاسونه ښکاري چې "د امریکا د ولسمشر ستونی یې نیولی دی."
د پوسټر پر مخ لیکل شوي: "د دنا (Dena) کښتۍ د مظلومو شهیدانو لپاره، زموږ د رهبر (وژل شوی مذهبي مشر علي خامنه ای) د وینې د غچ لپاره، د هغو کسانو لپاره چې کورونه یې ویجاړ شوي، د میناب (د ښوونځي په برید کې وژل شوو) ماشومانو لپاره، او د سویل د مظلومو خلکو لپاره انتقام حتمي دی."
