برلین وایي چې د پیټریوټ هوايي مدافعې قطعه او شاوخوا ۱۵۰ سرتېري به په تورکیه کې د امریکا د هغو ځواکونو ځای ونیسي چې د ناټو د سویل ختیځې برخې د پیاوړتیا لپاره هلته ځای پر ځای شوي دي.

چارواکو ویلي چې جرمني به په راتلونکو اونیو کې تورکیې ته د پیټریوټ هوايي مدافعې یو سیسټم واستوي، دا د ناټو د هغې طرحې برخه ده چې غواړي د اتحاد د سویل ختیځو پولو ساتنه پیاوړې کړي.

د جرمني دفاع وزارت د دوشنبې په ورځ په یوه بیان کې وویل چې د دغه هېواد وسله وال ځواکونه (بونډسویر) به د پیټریوټ "هوايي او توغندیزې دفاع ځانګړې ډله" جوړه کړي، چې له ترکي وسله والو ځواکونو سره به نږدې کار کوي.

د جرمني دفاع وزیر بوریس پیستوریوس وویل: "جرمني په ناټو کې دننه ډېر مسؤلیت پر غاړه اخلي." هغه زیاته کړه چې د جرمني د پیټریوټ قطعه او نږدې ۱۵۰ سرتېري به د امریکا د هغې قطعې ځای ونیسي چې دا مهال په ترکیه کې ځای پر ځای ده.

پیستوریوس وویل: "زموږ هوايي ځواک خورا ښه او په نړیواله کچه د درناوي وړ کار کوي." پخوانیو ماموریتونو ته په اشارې سره هغه زیاته کړه: "دوی به په خپل مسلکي توب سره د ناټو د هوايي حریم په ساتنه کې مهمه ونډه واخلي."

وزارت ویلي چې د جرمني د پیټریوټ قطعه به د ناټو د مربوطه هوايي او توغندیزې دفاع (NATO IAMD) تر چتر لاندې فعالیت کوي. د اوسنیو پلانونو له مخې، دا ماموریت به د روان کال له جون میاشتې څخه پیل او د ۲۰۲۶ کال تر سپټمبر پورې به دوام وکړي.