اتریش د طالبانو له واکمنېدو وروسته لومړی افغان ډیپورت کړ او وايي چې نور به هم ډیپورټ کړي.

اتریش د سې شنبې په ورځ د لومړي ځل لپاره یو افغان وګړی خپل هېواد ته ډیپورټ کړ، دا له هغه وروسته لومړی ځل دی چې څلور کاله وړاندې طالبانو هلته واک ترلاسه کړ. په ویانا کې د محافظه کارانو په مشرۍ ائتلافي حکومت ویلي چې ډېر ژر به نور هم وشړل شي.

حکومت د غیرقانوني کډوالۍ سره مبارزې ته تر ټولو لوړ لومړیتوب ورکړی، او داسې ښکاري چې غواړي د سخت دریځه ښي اړخي ازادۍ ګوند (FPO) پر یوې اساسي موضوع په تمرکز کولو سره د دغه ګوند ملاتړ کمزوری کړي.

د منځلارو ګوندونو درې ګوندي واکمن ائتلاف د مارچ په میاشت کې وروسته له هغې واک ته ورسېد چې سخت دریځه ښي اړخي ازادۍ ګوند پارلماني ټاکنې وګټلې خو د حکومت جوړولو په ائتلاف کې پاتې راغی. د نظر پوښتنو له مخې دا ګوند لا هم خپل برلاسی ساتلی دی.

د محافظه کار اتریشي ولسي ګوند لومړي وزیر، کریسټین سټوکر، پر X (پخواني ټویټر) ولیکل: "نن سهار، یو سړی چې په جدي جرمونو محکوم شوی و، کابل ته وشړل شو – دا له ۲۰۲۱ کال راهیسې افغانستان ته لومړنی اخراج دی."

هغه زیاته کړه: "اتریش په دې توګه یو روښانه پیغام ورکوي: د هر هغه چا لپاره چې د جرمي کړنو په ترسره کولو سره یې د پاتې کیدو حق له لاسه ورکړی وي، هیڅ زغم نشته."

د جولای په میاشت کې، اتریش د اروپايي ټولنې لومړنی هېواد شو چې د بشري حقونو د ډلو د مخالفتونو سره سره یې یو سوریایي خپل هېواد ته وشاړه، ځکه دغو ډلو ویلي وو چې دا ډېر وختي دی چې معلومه شي چې ایا هلته وضعیت خوندي دی که نه.

اتریش له میاشتو راهیسې ویلي چې د ورته مخالفتونو سربېره هیله لري افغانستان ته هم د اخراج لړۍ بیا پیل کړي.

د بښنې نړیوال سازمان په یوه اعلامیه کې ویلي چې افغانستان لا هم د نړۍ یو له تر ټولو خطرناکو هېوادونو څخه دی.

اعلامیې زیاته کړې: "هر څوک چې خلک داسې یوه دولت ته شړي چې د خپلو خلکو پر وړاندې جنایتونه کوي، په قصدي توګه له ملاتړ څخه انکار کوي او قانون ماتوي." په اعلامیه کې راغلي: "د بشري حقونو سره دا خیانت باید سمدستي ودرول شي!"

سوریه او افغانستان په اتریش کې د پناه غوښتونکو د اصلي هېوادونو په سر کې دي. حکومت ویلي چې په لومړي سر کې به ډېری هغه کسان وشړل شي چې مجرمین وي.

سټوکر وویل: "د ګیرهارد کارنر په مشرۍ د کورنیو چارو وزارت د نورو اخراجونو لپاره چمتووالی نیسي."