دغه ګوند وویل، هندي پولیسو د شنبې په ورځ د ټاکنو کمېسیون پر وړاندې تر یوه ستر پلان شوي لاریون مخکې، د طنزي 'کاکروچ جنتا ګوند' (CJP) د انلاین غورځنګ مشر ونیوه.

د ځوانانو په مشرۍ د (CJP) ګوند په ټولنیزو رسنیو کې د یوه پوسټ په خپرولو سره ویلي، ابیجیت ډیپکي (Abhijeet Dipke) او دوه نور مشران یې په پلازمېنه نوي ډیلي کې، چېرې چې ټاکل شوې وه دا لاریون ترسره شي، له الوتکې څخه تر ښکته کېدو مخکې نیول شوي دي.

دا لاریونونه د هند د ټاکنو کمېسیون له لوري د رای ورکوونکو د نوملړ په سرتاسري بیاکتنه کې د درغلیو یا سرغړونو له ادعاوو وروسته، د اپوزیسیون د څو اونیو خوځښتونو وروستۍ پایله ده.

د اپوزیسیون ګوندونه او نیوکې کوونکي وايي چې دا بیاکتنه کولی شي میلیونونه کسان د رایې ورکولو له حق څخه بې برخې کړي او د لومړي وزیر نریندرا مودي حاکم هندو ملتپال 'بهارتیا جنتا ګوند' (BJP) ته ګټه ورسوي.

د هند د ټاکنو کمېسیون  په دې "ځانګړې ژورې بیاکتنې" کې د درغلیو ادعاوې رد کړي او ویلي یې دي چې د دې کار موخه د تکراري او په شرایطو د نه پوره (نا اهله) رای ورکوونکو د نومونو لرې کول وو.

د اپوزیسیون د عام ادمي ګوند (Aam Aadmi Party) غړي اروند کېجریوال  په یوه اعلامیه کې وویل: "دا رسماً روښانه ده... موږ د مودي په واکمنۍ کې تر یوې مطلقې دیکتاتورۍ لاندې ژوند کوو."

"له الوتکې څخه سملاسي په ښکته کېدو د کاکروچانو (د کاکروچ ګوند غړو) نیول، د وېرې یوه بې ساري کچه ښيي."

ډیلی له جمعې ورځې راهیسې تر کلکو امنیتي تدابیرو لاندې دی او لسګونه زره پولیس او نیمه پوځي ځواکونه ځای پر ځای شوي ترڅو د هغو کسانو مخه ونیسي چې د پلازمېنې په زړه کې د لاریون اصلي ځای ته د ورتلو هڅه کوي.

چارواکو لسګونه د میټرو سټېشنونه تړلي، ډیلي ته راتلونکي څو اورګاډي یې لغوه کړي او د لاریون د ځای شاوخوا یې د موبایل انټرنیټ په لنډمهاله توګه پرې کړی دی.

د شنبې په ورځ تلویزیوني انځورونو وښودل چې د مرکزي ډیلي په شاوخوا سیمو کې پولیسو څو لاریون کوونکي تعقیبول او په موټرو کې یې اچول.

د سیمه ییزو رسنیو د راپورونو له مخې، تر دې دمه له ۲۰۰ څخه ډېر لاریون کوونکي نیول شوي دي.

دا لاریونونه تر ډېره د جولای په میاشت کې د کاکروچ ګوند  د پراخو ولسي خوځښتونو تکرار ګڼل کېږي، چې له امله یې د پوهنې وزیر د ازموینو د یوې رسوایۍ (سکینډل) پر سر استعفا ورکولو ته اړ شو.

دا ځل، دوی غوښتنه کوي چې د هند د ټاکنو کمېسیون (ECI) مشر، ګیانیش کمار (Gyanesh Kumar) دې له خپلې دندې استعفا ورکړي.