د غزې د اوربند د لومړي پړاو په ترڅ کې حماس د ۲۰ اسرائیلي اسیرانو د خوشې کولو بهیر بشپړ کړ
د ۱۳ اسرائیلي بندیانو دویمه ډله هم سره صلیب ته وسپارل شوه، وروسته له هغه چې نن د دوشنبې په ورځ یوه اووه کسیزه لومړنۍ ډله ازاده شوې وه.
د اسرائیلي رسنیو د راپورونو له مخې، د فلسطین مقاومت ډلې حماس په غزه کې ۱۳ نور اسرائیلي اسیران د سره صلیب نړیوالې کمېټې ته سپارلي دي.
۱۲م چینل راپور ورکړی، چې د سره صلیب نړیوالې کمېټې د دوشنبې په ورځ د حماس له پوځي څانګې، قسام لوا، څخه ۱۳ اسرائیلي بندیان ترلاسه کړل او هغوی اوس د اسرائیل پر لور روان دي.
د ۱۳ بندیانو په سپارلو سره، د اوربند د هوکړې له مخې د ټولو ۲۰ ژوندیو اسرائیلي اسیرانو د خوشې کولو بهیر بشپړ شو. تر دې مخکې د دوشنبې په ورځ یوه اووه کسیزه لومړنۍ ډله هم خوشې شوې وه.
د غزې د اوربند د تړون له مخې، د خوشې شویو اسرائیلي یرغملو په بدل کې به ۱۹۶۸ فلسطیني بندیان، چې په هغوی کې ۲۵۰ تنه په عمري قید محکوم دي، هم ازاد شي.
