روسیې او اوکراین د بندیانو د پراخې تبادلې درېیم او وروستی پړاو تایید کړی دی، چې د روانې میاشتې په پیل کې په استانبول کې د یوې هوکړې له مخې ترسره شو.
د روسیې د دفاع وزارت په یوه بیان کې د یکشنبې په ورځ وویل چې اوکراین ۳۰۳ روسي پوځیان خوشې کړي چې، په بدل کې ۳۰۳ اوکرایني سرتیري کیف ته وسپارل شول.
په بیان کې زیاته شوې: "اوس مهال روسي پوځیان د بیلاروس جمهوریت په خاوره کې دي، چیرې چې دوی ته اړین رواني او طبي مرسته ورکول کېږي." دغه پوځیان به د درملنې او بیا رغونې لپاره روسیې ته ستانه شي.
د اوکراین ولسمشر ولادیمیر زیلینسکي هم په ایکس (پخوانی ټویټر) کې د دې تبادلې پخلی وکړ او له هغه ډلې یې مننه وکړه چې "شپه او ورځ یې کار وکړ ترڅو دا تبادله په بریالیتوب ترسره کړي."
د استانبول د سولې خبرې
زیلینسکي زیاته کړه: "موږ به حتماً خپل ټول خلک د روسیې له بند څخه بېرته خلاص کړو."
تورکیې د مې په ۱۶مه په استانبول کې د روسیې او اوکراین ترمنځ درې کلونو کې لومړۍ مستقیمې خبرې و کړې، چیرې چې دواړو خواوو د بندیانو د پراخې تبادلې هوکړه وکړه چې له مخې یې د هرې خوا ۱۰۰۰ کسان شامل وو، او د اوربند لپاره خبرو اترو فرصت ولټول شو.
تر دې هوکړې وروسته دوه تبادلې ترسره شوې، چې په ترڅ کې یې په تېرو دوو ورځو کې د هرې خوا ۳۹۰ او ۳۰۷ بندیان تبادله کړل.
د وروستۍ تبادلې سره دا پړاو بشپړ شو.
