د ایران د  پارلمان رئیس قالیباف وایي، په سویلي ایران کې د امریکا له تازه بریدونو وروسته به ایران د واشنګټن فشارونو ته سر ټیټ نه کړي.

د ایران د پارلمان رئیس محمد باقر قالیباف متحده ایالاتو ته خبرداری ورکړی چې د هرمز تنګی به یوازې د "ایران د ترتیباتو" له مخې پرانیستل کیږي، نه د امریکا د ګواښونو له لارې. نوموړي دا څرګندونې پر ایران د امریکا د نویو بریدونو له څپې وروسته کړې دي.

قالیباف پر اېکس (پخواني ټویټر) لیکلي: "امریکا لا تر اوسه نه ده زده کړې چې زورواکي او د ژمنو ماتول نور بې بیې نه دي."

هغه زیاته کړه: "اجازه راکړئ واضح کړم: که برید وکړئ، برید به درباندې وشي."

قالیباف واشنګټن ته د هرمز تنګي په اړه پر تهران د فشار راوړلو د هڅو په اړه هم خبرداری ورکړ.

هغه وویل: "د هرمز تنګی به یوازې د ایران د ترتیباتو له مخې پرانیستل شي، نه د امریکایي ګواښونو پر اساس." هغه زیاته کړه: "بې ځایه لاس و پښې مه وهئ، ګنې نور به هم ډوب شئ."

امریکا سویلي برخې په نښه کوي

دا څرګندونې وروسته له هغه وشوې چې ایراني رسنیو د چهارشنبې په ناوخته د ایران په سویلي او سویل ختیځو سیمو کې د امریکا د نویو بریدونو خبر ورکړ.

د امریکا مرکزي قوماندانۍ (CENTCOM) وروسته وویل چې امریکایي ځواکونو د هرمز تنګي کې د کښتۍ چلولو ازادۍ ته د ایران د ګواښلو وړتیا نوره هم د کمولو په موخه اضافي بریدونه کړي دي.

په ورته وخت کې، د ایران سپاه پاسداران (انقلابي ساتونکو) خبرداری ورکړی چې د امریکا د بریدونو هر ډول تکرار به یو پراخ ځواب پاروي.

سپاه پاسداران ویلي چې که واشنګټن نور بریدونه وکړي، د دوی غچ اخیستنه به په ټوله سیمه کې د امریکا نورو اډو ته هم وغځېږي.