چین د ګمرکي تعرفو په اړه د موافقې نه د سرغړونې په اړه د امریکا ادعاوې په کلکه توګه رد کړي دي.

چین ویلي دي چې دوې د امریکا  هغه ادعاوې په کلکه ردوي چې ګواکې چین د نړۍ د دوو لویو اقتصادونو ترمنځ د تعرفو د کمولو تړون مات کړی دی.

بیجینګ او واشنګټن تېر میاشت په دې موافقه وکړه چې د ۹۰ ورځو لپاره د یو بل پر وارداتو لوړ تعرفې په موقت ډول کمې کړي، دا موافقه د جنیوا په خبرو کې د لوړ پوړو چارواکو ترمنځ شوې وه.

خو د امریکا د سوداګرۍ وزیر هاورډ لوتنیک د یکشنبې په ورځ د "فوکس نیوز سنډې" سره په خبرو کې وویل چې بیجینګ د دې تړون په عملي کولو کې ځنډ کوي.

بیجینګ د دوشنبې په ورځ په ځواب کې وویل چې واشنګټن "بې اساسه تورونه لګولي او په ناحقه یې چین د موافقې په  ماتولو تورن کړی، چې دا د حقایقو سره په بشپړ ډول په ټکر کې دي."

د چین د سوداګرۍ وزارت په یوه بیان کې وویل: "چین دا بې ځایه تورونه په کلکه ردوي."

د امریکا ولسمشر ډونالډ ټرمپ تېره اوونۍ وویل چې چین "په بشپړ ډول تړون مات کړی دی"، خو د دې ادعا لپاره یې کوم جزئیات وړاندې نه کړل.

خو د چین د سوداګرۍ وزارت وویل چې "چین د خپلو حقونو او ګټو په ساتنه کې کلک دریځ لري او د موافقې په عملي کولو کې یې اخلاص ښودلی دی."

واشنګټن "په پرله پسې توګه د چین پر وړاندې یو شمېر تبعیضي محدودیتونه لګولي دي"، وزارت وویل، د مصنوعي زیرکتیا پر چپسونو د صادراتو کنټرول او په امریکا کې د چینایي زده کوونکو ویزو لغوه کول د واشنګټن نیت په ډاګه کوي.

وزارت زیاته کړه: "موږ له امریکا څخه غواړو چې د چین سره یوه مناسبه حل لار پیدا کړي، سمدستي خپلې ناسمې کړنې سمې کړي، او د جنیوا د سوداګرۍ خبرو اترو څخه ترلاسه شوې موافقې په ګډه وساتي."

که داسې ونه کړي، "چین به د خپلو مشروع حقونو او ګټو د ساتنې لپاره په کلکه قوي ګامونه پورته کړي."