د ملګرو ملتونو د بشري مرستو لوړپوړي چارواکي په غزه کې د بشري ناورین د چټک پرمختګ په اړه خبرداری ورکړی دی. هغه ویلي  په غزه کې د هرو ۳ تنو نه یو تن د څو ډوډۍ نده خوړلې او ماشومان د خوراکي مرستو د سخت کمښت  او خوارځواکۍ له امله ژوند د لاسه ورکوي.

ټام فلیچر، د بشري چارو لپاره د ملګرو ملتونو مرستیال عمومي منشي او د بیړنیو مرستو همغږي کوونکي، د یکشنبې په ورځ وویل چې سره له دې چې اسرائیل د یوې اونۍ لپاره د مرستو د زیاتولو اعلان کړی، لا هم د قحطۍ د مخنیوي لپاره پراخو مرستو ته اړتیا ده.

فلیچر په یوه بیان کې چې په ایکس خپور شوی، وویل: "په غزه کې بشري بحران ویجاړونکی دی. درېیمه برخه خلک څو ورځې دي چې ډوډۍ نه دي خوړلې. خلک یوازې د دې لپاره چې خپلې کورنۍ ته خواړه پیدا کړي، په ډزو وژل کېږي."

لومړني راپورونه ښيي چې له سرحدونو څخه د مرستو د لیږد لپاره له ۱۰۰ څخه زیات ټرکونه راټول شوي دي.

هغه زیاته کړه: "د قحطۍ او د روغتیا د ناورین د مخنیوي لپاره پراخو مرستو ته اړتیا ده."

هغه د عاجلې او دوامداره لاسرسي غوښتنه وکړه، د کاروانونو د چټک تګ، د ورځي څو ځله سرحدي تګ راتګ، د دوامداره سون موادو برابرولو او د خوندي بشري لارې د پرانیستلو غوښتنه وکړه چې له بریدونو څخه خوندي وي.

هغه وویل: "مرستې باید بندې، ځنډول شوې یا تر برید لاندې ونه نیول شي."

فلیچر د ملګرو ملتونو هغه غوښتنه هم تکرار کړه چې ټول یرغمل شوي کسان دې سمدستي او بې قید و شرطه خوشې شي.

هغه زیاته کړه: "په پای کې، البته، موږ یوازې د وقفې اړتیا نه لرو — موږ دایمي اوربند ته اړتیا لرو."

نسل وژنه

اسرائیل په محاصره شوې غزه کې نږدې ۶۰,۰۰۰ فلسطینیان، چې زیاتره یې ښځې او ماشومان دي، وژلي دي.

د فلسطین رسمي خبري اژانس (وفا) په وینا، شاوخوا ۱۱,۰۰۰ فلسطینیان د ویجاړ شویو کورونو لاندې ښخ شوي دي.

خو کارپوهان باور لري چې د مړو شمیر د غزې د چارواکو له راپورونو څخه خورا زیات دی او اټکل کوي چې دا شمیره ښایي ۲۰۰,۰۰۰ ته ورسیږي.

د نسل وژنې په جریان کې، اسرائیل د محاصره شوې غزې زیاتره برخې ویجاړې کړې دي او په عملي توګه یې ټول نفوس بې ځایه کړی دی.

تیر نوامبر، د نړیوالې جنایي محکمې لخوا د اسرائیل د لومړي وزیر بنیامین نتنیاهو او د هغه د پخواني دفاع وزیر یوآف ګالانت لپاره د جنګي جرمونو او د بشریت پر وړاندې د جرمونو په تور نیولو حکمونه صادر شول.

اسرائیل د غزې په وړاندې د جګړې لپاره د نړیوالې محکمې لخوا د نسل وژنې په قضیه کې هم مخ دی.