د تورکیې د  بهرنیو چارو وزیر هاکان فیدان د سیمه ییزې غونډې په پلانونو کې د بدلون خبر ورکوي او وايي، تمه ده چې د تورکیې، پاکستان، مصر او سعودي عربستان ترمنځ خبرې اترې د روانې اونۍ په پای کې په پاکستان کې وشي.

انقرې ویلي، چې په منځني ختیځ کې د جګړې په اړه د پاکستان، سعودي عربستان، مصر او تورکیې ترمنځ خبرې اترې ښايي د روانې اونۍ په پای کې د پاکستان پر خاوره ترسره شي.

فیدان زیاته کړه: "امکان لري چې موږ د روانې اونۍ په پای کې هلته سره وګورو."

د انقرې د دغه لوړپوړي ډیپلومات په وینا، په دې خبرو اترو کې به د څلورو اسلامي  هېوادونو د بهرنیو چارو وزیران ګډون وکړي.

د جمعې په ورځ، د جرمني د بهرنیو چارو وزیر یوهان وادپول (Johann Wadephul) وویل، چې دی تمه لري "ډېر ژر" په پاکستان کې د امریکا او ایران ترمنځ مستقیمه غونډه وشي، خو سرچینه یې په ډاګه نه کړه.

که څه هم تهران له واشنګټن سره د رسمي خبرو له منلو انکار کړی، خو د ایران تسنیم خبري اژانس د یوې نامعلومې سرچینې په حواله ویلي، چې ایران د اسلام اباد له لارې د جګړې د پای ته رسولو لپاره د امریکا د ولسمشر ډونالډ ټرمپ ۱۵ ماده ییز پلان ته ځواب لېږلی دی.

په ورته وخت کې، د ټرمپ ځانګړي استازي سټیو ویټکوف  د جمعې په ورځ وویل، دی باوري دی چې ایران به په منځني ختیځ کې د یوې میاشتې اوږدې جګړې د پای ته رسولو لپاره "په روانه اونۍ کې" له واشنګټن سره خبرې وکړي.

ویټکوف په میامي کې یوې سوداګریزې غونډې ته د ایران د خبرو په اړه د یوې پوښتنې په ځواب کې وویل: "موږ فکر کوو چې په روانه اونۍ کې به غونډې وشي، او موږ یقیناً ورته هیله من یو."

یوه جګپوړي ایراني چارواکي د جمعې په ورځ وویل، پر ایران د امریکا بریدونه او په ورته وخت کې د خبرو اترو غوښتنه "د نه زغم وړ" ده، او زیاته یې کړه چې تهران لا تر اوسه پر صنعتي او اټومي زیربناو د بریدونو له امله د امریکا وړاندیز ته د ځواب ورکولو پرېکړه نه ده کړې.

دغه چارواکي زیاته کړه، په اصل کې تمه وه چې د امریکا وړاندیزونو ته د ایران ځواب د جمعې یا شنبې په ورځ ورکړل شي.