د بریتانیا د ویزې بندیزونو انګولا او نمیبیا د ستنېدونکو کډوالو منلو ته اړ کړل
دا هوکړې د تېرې میاشتې د اعلان شویو اصلاحاتو له مخې لومړی لوی بدلون دی، چې موخه یې د کډوالۍ د حیثیت لنډمهاله کول دي.
د بریتانیا د کورنیو چارو وزارت ویلي، انګولا او نمیبیا وروسته له هغه د غیرمنظمو کډوالو او مجرمینو د بېرته منلو سره هوکړه وکړه، چې د بریتانیا حکومت هغه هېوادونه د ویزې په جزا وګواښل چې له همکارۍ ډډه کوي.
د کورنیو چارو وزارت د شنبې په ورځ ناوخته وویل، د کانګو دیموکراتیک جمهوریت د همکارۍ د ښه کولو لپاره د بریتانیا د غوښتنو په پوره کولو کې له پاتې راتلو وروسته، د ویزې له چټکو خدماتو او د مهمو شخصیتونو او پرېکړه کوونکو لپاره له ځانګړي چلند څخه بې برخې شوی دی.
د کورنیو چارو وزیرې شبانه محمود وویل، که کانګو "خپله همکاري ژر تر ژره ښه نه کړي"، بریتانیا کولی شي خپل اقدامات سخت کړي او د دغه هېواد لپاره ویزې په بشپړه توګه ودروي.
د کورنیو چارو وزیرې زیاته کړه: "موږ له هېوادونو تمه لرو چې اصول مراعت کړي. که د دوی یو وګړی دلته د اوسېدو حق ونه لري، باید بېرته یې ومني."
دا هوکړې د تېرې میاشتې اعلان شویو اصلاحاتو له مخې لومړی لوی بدلون دی، چې موخه یې د پناه غوښتنې حیثیت لنډمهاله کول او بریتانیا ته د راغلو کسانو د شړلو پروسه ګړندۍ کول دي.
د بریتانیا د بهرنیو چارو وزیرې ایویټ کوپر وویل چې بریتانیا د تېر کال له جولای راهیسې "تر ۵۰،۰۰۰ ډېر هغه کسان ایستلي چې د پاتې کېدو حق یې نه درلود"، چې دا د تېرې مودې په پرتله ۲۳ سلنه زیاتوالی ښيي.
هغې ډیپلوماټانو ته لارښوونه وکړه چې د کډوالو بېرته ستنول خپل لومړیتوب وګرځوي.
د پناه غوښتنې
لومړی وزیر کیر سټارمر، چې تېر دوبي وټاکل شو، له فرانسې څخه په کوچنیو کښتیو کې د انګلیس کانال له لارې د کډوالو د اوښتو د مخنیوي لپاره تر فشار لاندې دی، دا هغه ستونزه ده چې د هغه محافظه کارو مخکینو ته یې هم سرخوږی جوړ کړی و.
سږکال تر ۳۹،۰۰۰ ډېر کسان، چې ډېری یې له جګړو تښتېدلي، د داسې خطرناکو سفرونو له لارې راغلي دي، چې دا شمېر د ۲۰۲۴ کال له ټولټال شمېر څخه ډېر دی، خو د ۲۰۲۲ کال له ریکارډ څخه کم دی.
د رسمي ارقامو له مخې، په بریتانیا کې د پناه غوښتنې کچه ریکارډ کچې ته رسېدلې، چې د ۲۰۲۵ کال د جون تر پایه په یو کال کې شاوخوا ۱۱۱،۰۰۰ غوښتنلیکونه سپارل شوي دي.
تر سلو ډېرو برتانوي خیریه موسسو محمود ته لیکلي او له هغې یې غوښتي چې "پر کډوالو د پړې اچولو او نمایشي پالیسیو ته، چې یوازې زیان اړوي، د پای ټکی کېږدي". دوی ویلي چې دا ډول ګامونه توکمپالنې او تاوتریخوالي ته لمن وهي.
نظرپوښتنې ښيي چې کډوالي د رای ورکوونکو لپاره تر اقتصاد هم لویه اندېښنه ګرځېدلې ده.
د ۲۰۲۵ کال د مارچ په پای ته رسېدونکي کال کې شاوخوا ۱۰۹،۳۴۳ کسانو په بریتانیا کې د پناه غوښتنه کړې، چې دا د تېر کال په پرتله ۱۷ سلنه زیاتوالی او د ۲۰۰۲ کال د ۱۰۳،۰۸۱ لوړې کچې په پرتله ۶ سلنه ډېروالی ښيي.
