بیجینګ پر امریکا، هند، جاپان او اسټرالیا د هند-ارام سمندر په سیمه کې د زیاتېدونکې همکارۍ له امله نیوکه وکړه او ویې ویل چې سیمه ییز شراکتونه باید دریم هېوادونه په نښه نه کړي. دا غبرګون وروسته له هغه څرګند شو چې د "کواډ" وزیرانو د سمندري امنیت او حیاتي منرالونو په اړه نوي نوښتونه اعلان کړل.
چین د سه شنبې په ورځ د امریکا، هند، جاپان او اسټرالیا پر "کواډ" (Quad) اتحاد نیوکه وکړه او دغه ډلې ته یې د نورو هېوادونو د په نښه کولو په اړه خبرداری ورکړ.

د چین د بهرنیو چارو وزارت ویاندې ماو نینګ په یوه خبري ناسته کې وویل: "موږ د انحصاري 'کوچنیو کړیو' یا بلاکي مقابلې ملاتړ نه کوو او هیڅ همکاري باید په سیمه کې د هېوادونو ترمنځ متقابل باور او همکارۍ ته زیان ونه رسوي." هغې زیاته کړه: "موږ تل باور لرو چې د هېوادونو ترمنځ همکاري باید د سیمه ییزې سولې، ثبات او سوکالۍ په وده کې مرسته وکړي او باید هیڅ دریم لوری په نښه نه کړي."

د هند د بهرنیو چارو وزیر ایس جیشنکر په نوي ډیلي کې د خبرو اترو لپاره د امریکا د بهرنیو چارو د وزیر مارکو روبیو، د اسټرالیا د بهرنیو چارو د وزیرې پیني وانګ او د جاپان د بهرنیو چارو د وزیر توشیمیتسو موټیګي کوربه توب وکړ. دغو څلورو هېوادونو د سمندري څارنې، د حیاتي منرالونو د اکمالاتي زنځیرونو او د انرژۍ د امنیت په اړه نوي نوښتونه اعلان کړل.

په یوه اعلامیه کې، د کواډ د بهرنیو چارو وزیرانو وویل چې دوی د جنوبي چین سمندر او ختیځ چین سمندر په جنجالي سیمو کې د وضعیت په اړه "سخت اندېښمن" دي. هغوی زیاته کړه: "موږ د هر ډول بې ثباته کونکو یا یو اړخیزو اقداماتو په وړاندې، په شمول د زور یا فشار کارولو چې په سیمه کې سوله او ثبات ګواښي، پر خپل سخت مخالفت ټینګار کوو."

کواډ اتحاد چې په ۲۰۰۷ کال کې رامنځته شوی، په وروستیو کلونو کې په هند-ارام سمندر سیمه کې له چین سره د کړکېچ په زیاتېدو سره خپلې همکارۍ پراخې کړې دي.

ماو نینګ د جاپان د کابینې د منشي مینورو کیهارا هغو څرګندونو ته هم ځواب ورکړ چې ویلي یې وو د جاپان "یوازې پر دفاع ولاړه پالیسي" نه ده بدله شوې او د جاپان د نوي نظامي توب  په اړه یې د چین ادعاوې بې بنسټه بللې وې. هغې پر جاپان غږ وکړ چې "له تاریخ څخه ژور درسونه واخلي، سولې ته پر خپلې ژمنې عمل وکړي او د کوټلو اقداماتو له لارې د خپلو آسیایي ګاونډیو او نړیوالې ټولنې باور ترلاسه کړي." هغې زیاته کړه: "هغه څه چې جاپان یې ترسره کوي، د هغو خبرو په پرتله چې کوي یې، خورا ډېر اهمیت لري."