د پاکستان پوځ ویلي چې د چهارشنبې په ورځ د دغه هېواد په سویل لویدیځ ناکرار ایالت بلوچستان کې له وسله والو سره په نښتو کې د یوه پوځي مېجر (جګړن) په ګډون پنځه سرتېري وژل شوي دي. یوې ناقانونه بېلتون غوښتونکې ډلې ددې برید مسئولیت په غاړه اخیستی دی.
د پوځ په وینا، امنیتي ځواکونو د دغه ایالت په "بارخان" ولسوالۍ کې د هغو وسله والو د ځپلو لپاره عملیات پیل کړي وو چې اسلام اباد ادعا کوي د هند له خوا یې ملاتړ کېږي. د دغه ایالت ناقانونه بېلتون غوښتونکې ډلې، بلوچستان ازادۍ پوځ (BLA)، په یوه بیان کې ویلي چې د دوی جنګیالیو پر پوځیانو برید کړی، چې له امله یې سخته نښته رامنځته شوې ده.
پوځ وویل چې په وژل شویو نظامي منسوبینو کې یو جګړن افسر هم شامل دی او زیاته یې کړه چې په دې جګړه کې اووه وسله وال هم وژل شوي دي.
په طبیعي سرچینو بډایه بلوچستان چې د پاکستان تر ټولو پراخ خو لږ نفوس لرونکی ایالت دی له ډېرې مودې راهیسې د بېلتون غوښتونکو ډلو له بغاوت او د پاکستاني طالبانو له بریدونو سره مخ دی. د ویلو ده چې امریکا په ۲۰۱۹ کال کې د بلوچستان د ازادۍ پوځ ډله د یو ترهګر سازمان په توګه وپېژندله، چې په وروستیو کلونو کې په دغه ایالت کې پر امنیتي ځواکونو او ملکي وګړو ګڼ شمېر بریدونه کړي دي.
پوځ وژل شوي وسله وال د "فتنة الهندستان" غړي بللي؛ دا هغه اصطلاح ده چې پاکستاني چارواکي یې د هغو وسله والو لپاره کاروي چې ادعا کوي د هند له خوا یې ملاتړ کېږي.
هند په وار وار په پاکستان کې د وسله والو ډلو د ملاتړ تورونه رد کړي دي.
