ایران د یوې "عادلانه او مساوي اټومي هوکړې" لپاره چمتو دی
د ایران د بهرنیو چارو وزیر عباس عراقچي تورکیې ته د خپل سفر پر مهال یو ځل بیا د اټومي وسلو پر نه لرلو او ډیپلوماسۍ ته پر پرانیستې غاړه ټینګار وکړ.
ایران چمتو دی چې د یوې "عادلانه او مساوي اټومي هوکړې" برخه شي او "هیڅکله" یې د اټومي وسلو د ترلاسه کولو هڅه نه ده کړې. د ایران د بهرنیو چارو وزیر عباس عراقچي دا څرګندونې د تورکیې له ولسمشر رجب طیب اردوغان او د بهرنیو چارو له وزیر هاکان فیدان سره په لیدنه کې وکړې.
عراقچي د شنبې په ورځ پر خپله ایکس (X) پاڼه ولیکل: "زموږ په خبرو کې ما یو ځل بیا ټینګار وکړ چې ایران هیڅکله د اټومي وسلو په لټه کې نه دی او چمتو دی چې یوه عادلانه او مساوي اټومي هوکړه ومني چې زموږ د خلکو مشروع ګټې خوندي کړي؛ پدې کې د 'اټومي وسلو نه شتون' ډاډ او د بندیزونو د لیرې کولو تضمین شامل دی."
هغه د تورکیې او ایران ترمنځ د دوه اړخیزو اړیکو او سیمه ییزو مسایلو په اړه د شویو خبرو اترو له امله خوښي څرګنده کړه او ویې ویل چې انقرې د نورو "ورونو" هېوادونو ترڅنګ په سیمه کې د سولې او ثبات د ټینګښت لپاره خپلې ښې هڅې (Good Offices) وړاندې کړې دي.
عراقچي ټینګار وکړ چې تهران د داسې هڅو "منندوی دی او هرکلی یې کوي." هغه د سیمې له هېوادونو سره د ثبات د ساتلو او د سیمې د "غیرقانوني تېري" څخه د ژغورلو لپاره د کار کولو چمتووالی وښود.
دا خبرې اترې په داسې حال کې کیږي چې عراقچي د جمعې په ورځ تورکیې ته رسمي سفر درلود.
بلخوا، د ایران ولسمشر مسعود پزشکیان د شنبې په ورځ وویل چې د امریکا ولسمشر ډونالډ ټرمپ، د اسرائیل لومړي وزیر بنیامین نتانیاهو او اروپا په هغو وروستیو لاریونونو کې چې هېواد یې ولرزاوه، کړکېچ ته لمن وهلې او خلک یې "پارولي" دي.
