تورکیې او حماس چارواکو په استانبول کې د غزې د اوربند د لارې پر نقشې خبرې وکړې
دواړو خواوو د غزې د اوربند د دوام ډاډمنولو پر ګامونو، د اوسنیو ننګونو د له منځه وړلو پر لارو چارو او کلابندې سیمې ته د بشري مرستو د زیاتولو پر هڅو خبرې وکړې.
د تورکیې د ملي استخباراتو سازمان (MIT) مشر ابراهیم قالن په استانبول کې د حماس د سیاسي دفتر د مذاکراتي کمېټې د مشر خلیل الحیه په مشرۍ له یوه پلاوي سره لیدلي او د غزې د اوربند پلان د راتلونکو پړاوونو د پلي کولو په اړه یې پر لارو چارو خبرې کړې دي.
د امنیتي سرچینو په وینا، د چهارشنبې په ورځ په دې لیدنه کې د حماس پلاوي د انقرې د منځګړیتوب له هڅو او د غزې د اوربند تړون په خوندي کولو او څارنه کې د تضمین کوونکي په توګه د رول له امله له تورکیې او په ځانګړې توګه له ولسمشر رجب طیب اردوغان څخه مننه وکړه.
حماس اوربند ته ژمن دی
دغه پلاوي د اوربند په موده کې د اسرائیلو له خوا د پرلهپسې سرغړونو سربېره، اوربند ته د حماس پر ژمنتیا یو ځل بیا ټینګار وکړ.
دواړو خواوو د اوربند د بهیر د اسانه پرمختګ لپاره پر اړینو ګامونو او د روانو ننګونو د حل پر لارو چارو خبرې وکړې.
دوی همدارنګه د اوربند پلان د راتلونکو پړاوونو د پلي کولو په اړه هم د نظرونو تبادله وکړه.
په دې لیدنه کې غزې ته د تورکیې د روانو بشري مرستو او په دغه سیمه کې د بشري ناورین د کمولو پر هڅو هم خبرې وشوې.
قالن پلاوي ته دغې کلابندې سیمې ته د اضافي مرستو د رسولو د اسانتیا لپاره له نړیوالو سازمانونو سره د همغږۍ په اړه معلومات ورکړل.
