د امریکا ولسمشر د دوو اونیو لپاره پر ایران د بریدونو د ځنډولو اعلان وکړ او دا یې یو "دوه اړخیز اوربند" وباله. هغه له پاکستان سره خبرو ته په اشارې وویل چې د امریکا ټول نظامي اهداف ترلاسه شوي او د تلپاتې سولې لپاره هڅې پرمخ روانې دي.
د امریکا ولسمشر ډونالډ ټرمپ اعلان کړی چې دی به د دوو اونیو لپاره پر ایران بریدونه ودروي. ټرمپ د سه شنبې په ورځ پر خپله ټولنیزه شبکه "ټروټ سوشل" (Truth Social) ولیکل: "زه د دوو اونیو لپاره د ایران بمبارول او پر هغه هیواد بریدونه ځنډوم. دا به یو دوه اړخیز اوربند وي!"

هغه وویل چې دا پرېکړه یې د پاکستان له لومړي وزیر شهباز شریف او فیلډ مارشال عاصم منیر سره تر خبرو وروسته کړې ده. ټرمپ زیاته کړه چې دا اوربند په دې شرط دی چې ایران د هرمز ستراتیژیکه تنګي "بشپړ، سمدستي او په خوندي ډول" پرانیزي.

د امریکا ولسمشر د خپلې پرېکړې لامل دا وښود چې امریکا لا دمخه خپلو ټولو نظامي اهدافو ته رسیدلې او ان تر هغې زیات څه یې ترلاسه کړي دي. هغه زیاته کړه: "موږ له ایران سره د یوې دایمي سولې او په منځني ختیځ کې د ټیکاو په اړه یوې پرېکنده هوکړې ته ډیر نږدې شوي یو."

د ایران غبرګون:
د ایران د بهرنیو چارو وزیر عباس عراقچي وویل، که پر ایران بریدونه ودرول شي، دوی به هم خپل دفاعي عملیات ودروي. عراقچي پر ټویټر (X) ولیکل: "که پر ایران بریدونه بند شي، زموږ پیاوړي وسله وال ځواکونه به خپل دفاعي عملیات ودروي. د دوو اونیو لپاره به د هرمز تنګي له لارې تګ راتګ د ایران له وسله والو ځواکونو سره په همغږۍ او تخنیکي ملاحظاتو ته په کتو ممکن وي."

عراقچي له پاکستان، لومړي وزیر شهباز شریف او عاصم منیر څخه مننه وکړه چې د جګړې د پای ته رسولو لپاره یې هڅې کړي دي.
د رویټرز خبري اژانس د ایراني رسنیو په حواله راپور ورکړی چې د دواړو هیوادونو ترمنځ رسمي خبرې اترې به د جمعې په ورځ، د اپریل په ۱۰مه، په اسلام‌اباد کې پیل شي. همدارنګه د سپینې ماڼۍ دوو چارواکو رویټرز ته تایید کړې چې اسرائیل هم دې دوه اوونیز اوربند ته ژمن دی.

۱۰ ماده ییز وړاندیز:
ټرمپ په خپل اعلان کې وویل چې واشنګټن له ایران څخه یو ۱۰ ماده ییز وړاندیز ترلاسه کړی او باور لري چې دا د خبرو اترو لپاره یو "عملي اساس" دی. د هغه په وینا، د امریکا او ایران ترمنځ په نږدې ټولو اختلافي ټکو موافقه شوې، خو دا دوه اوونیز فرصت به اجازه ورکړي چې هوکړه وروستۍ او عملي شي.

دا اعلان وروسته له هغه وشو چې پاکستان په وروستۍ شېبه کې پر ایران د امریکا د سختو بریدونو د مخنیوي لپاره یو وړاندیز وکړ؛ دا په داسې حال کې وه چې ټرمپ خبرداری ورکړی و چې که هوکړه ونشي "نن شپه به یو بشپړ تمدن له منځه لاړ شي."