د جنوبي کوریا خلک به د سه شنبې په ورځ د ولسمشرۍ په ټاکنو کې ګډون وکړي څو د راتلونکو پنځو کلونو لپاره د هېواد نوی ولسمشر وټاکي. دا ټاکنې په داسې حال کې ترسره کېږي چې سیال نوماندان هڅه کوي د بې پرې رایه ورکوونکو ملاتړ ترلاسه کړي.
د دوشنبې په ورځ د کمپاین د سختې دورې پای ته رسیدو سره، د اصلي اپوزیسیون ډیموکراټ ګوند (DP) نوماند لي جای میونګ د واکمن خلکو ځواک ګوند (PPP) نوماند کیم مون سو څخه مخکې دی.
د یونهاپ خبري اژانس راپور ورکړی، په ټاکنو کې ټول شپږ نوماندان ګډون کوي. دواړه مخکښ نوماندان د دوشنبې په ورځ پلازمېنې سیول ته ورسېدل څو د وروستیو شېبو ملاتړ ترلاسه کړي.
وروستۍ نظرپوښتنې ښيي چې ۶۱ کلن لي، چې د بشري حقونو وکیل څخه سیاستوال شوی، د ۴۹.۲ سلنې ملاتړ سره مخکې دی. د هغه سیال، ۷۳ کلن کیم، چې د کار پخوانی وزیر دی، ۳۶.۸ سلنه ملاتړ لري.
د محافظه کاره نوي اصلاحاتي ګوند نوماند لي جون سوک په درېیم ځای کې دی چې ۱۰.۳ سلنه ملاتړ لري.
دا ټاکنې وروسته له هغې ترسره کېږي چې د جنوبي کوریا پخوانی ولسمشر یون سوک یول د تېر ډسمبر په میاشت کې د نظامي قانون د نافذولو هڅې له امله له خپلې دندې ګوښه شو.
په بهر کې مېشت جنوبي کوریايي وګړو لا دمخه خپلې رایې ورکړې دي، په داسې حال کې چې د تېرو اوونیو په اوږدو کې د دوه ورځو لپاره مخکې له ټاکنو رایه اچونه ترسره شوه.
د ملي ټاکنو کمیسیون په وینا، د هېواد له ۵۲ میلیونه وګړو څخه شاوخوا ۴۴.۴ میلیونه کسان د رایې ورکولو حق لري.
د رایې ورکولو بهیر د سهار په ۶ بجو (د ځایي وخت له مخې) پیل شو او د ماښام په ۸ بجو به پای ته ورسېږي. ټاکنیزه ورځ به عمومي رخصتي وي.
د ټاکنو پایلې به د سه شنبې په ماښام یا د چهارشنبې په لومړیو ساعتونو کې اعلان شي، ځکه چې د رایو شمېرنه به سمدستي پیل شي.
