له ۱۸۰ څخه ډیر غیرقانوني کډوال د پولنډ او بیلاروس ترمنځ د پولې لاندې د کیندل شوي تونل له لارې پولنډ ته داخل شوي دي.
د پولنډ د سرحدي ځواکونو لخوا د خپرې شوې اعلامیې له مخې، یاد تونل د هیواد په شمال ختیځ کې د پودلاسي سیمې د ناروکا کلي ته نږدې کشف شوی دی.
دا تثبیت شوې چې دغه تونل شاوخوا ۱.۵ متره لوړوالی لري، د بیلاروس له لوري یې د ننوتلو خوله له پولې څخه شاوخوا ۵۰ متره لرې او د پولنډ لوري ته یې د وتلو خوله د پولې له خنډ څخه شاوخوا ۱۰ متره لرې ده.
سرحدي ځواکونو د بریښنايي سیسټمونو په مرسته په لنډه موده کې تثبیت کړه چې له ۱۸۰ څخه ډیر بهرني وګړي د تونل له لارې پولنډ ته داخل شوي دي.
په پیل شویو عملیاتو کې له تښتیدلو کسانو څخه تر ۱۳۰ ډیر نیول شوي او د نورو لټون دوام لري.
ویل شوي چې د نیول شویو کسانو ډیری یې د افغانستان او پاکستان او ځینې نور یې د هند، نیپال او بنګله دیش اتباع دي.
دغه راز، دوه موټر چلوونکي چې یو یې پولنډی او بل لیتوانیايي و او سیمې ته د غیرقانوني کډوالو د وړلو لپاره راغلي وو، هم نیول شوي دي. ادعا شوې چې دغو کسانو لویدیځې اروپا ته د کډوالو د لیږدولو پلان درلود.
سرحدي ځواکونو د تونل ویډیو هم خپره کړې او ویلي یې دي چې دا سږکال د پولنډ-بیلاروس پر پوله څلورم کشف شوی تونل دی.
د پولنډ، لاتویا او لیتوانیا چارواکي، چې د بشري حقونو د ډلو له لوري "د کډوالو د شاته ټېل وهلو" له امله تر نیوکو لاندې دي، ادعا کوي چې د کډوالو دغه بهیر یو "ترکیبي برید" دی چې د بیلاروسي چارواکو په ملاتړ تنظیم شوی دی.
سره له دې چې په ټوله اروپايي ټولنه کې (د ناقانونه کډوالۍ کچه) راټیټه شوې، خو تېر کال د پولنډ، لاتویا او لیتوانیا له بیلاروس پولو څخه د غیرقانوني اوښتونکو کډوالو شمېر ۱۹۲ سلنه لوړ شوی و.
