د ملګرو ملتونو د شمېرو له مخې، د تېرې فبرورۍ میاشتې له پای څخه چې د دواړوګاونډیو هېوادونو ترمنځ جګړه پیل شوې، سلګونه کسان وژل شوي دي، که څه هم په وروستیو اونیو کې جګړه تر ډېره کمه شوې وه.

د کونړ ولایت یوه روغتیايي چارواکي وویل چې د دوشنبې په ورځ په دغه ولایت کې د تاوتریخوالي زیاتوالي له امله اووه تنه ملکي وګړي وژل شوي او ۸۵ نور ټپیان شوي دي.

په افغانستان کې د ملګرو ملتونو مرستندویه پلاوي (یوناما) وویل چې هغوی په هغو بریدونو کې "د لسګونو ملکي وګړو وژل کېدل یا ټپي کېدل" ثبت کړي دي چې پر یوه پوهنتون او د ولایت د مرکز اسداباد پر نورو سیمو شوي وو.

د افغانستان د بهرنیو چارو وزارت دا بریدونه "د هېواد د ارضي تمامیت څرګنده سرغړونه" وبلله او په کابل کې یې د پاکستان شارژدافیر احضار کړ. بلخوا، د پاکستان د اطلاعاتو وزارت تر دې وړاندې پر استوګنیزو سیمو یا پوهنتون برید رد کړی و او دا ډول ادعاوې یې "سپین سترګې درواغ" بللي وو.

د فرانسې خبري اژانس (AFP) خبریال د اسداباد په پوهنتون کې ماتې شوې کړکۍ او زیانمن شوي سولرونه لیدلي دي. ۲۰ کلن عرفان الله، چې د روانپوهنې محصل دی، وویل چې د یو زورور غږ له اورېدو وروسته ټول محصلین پر ځمکه پریوتل. هغه وویل: "هر محصل هڅه کوله چې یو خوندي ځای ته ځان ورسوي، خو کړکۍ ماتې شوې او ځینې محصلین ټپیان شول."

د عبادالله په نوم یو بل محصل وویل چې له برید وروسته بهر ته وتښتېد: "محصلین وتښتېدل، بوټان او کتابونه پر ځمکه پاتې شول." دغو دواړو محصلینو د امنیتي ستونزو له امله خپل تخلصونه ونه ښودل.

له ۲۰۲۱ کال راهیسې چې طالبان بیا په کابل کې واک ته ورسېدل، د پاکستان او افغانستان اړیکې ترینګلې شوې دي. دا وروستی تاوتریخوالی سږ کال په سرحدي سیمو کې د سختو جګړو او د افغانستان پر ښارونو، لکه کابل، د پاکستان د بې ساري هوايي بریدونو په دوام رامنځته کېږي.

د مارچ په میاشت کې پر یو څو ورځني اوربند هوکړه شوې وه او منځګړي هېواد، چین، وروسته وویل چې جنګي لورو د جګړې د نه زیاتوالي ژمنه کړې ده. اسلام اباد د افغانستان حکومت تورنوي چې هغو وسله والو ته یې پناه ورکړې چې پر پاکستان بریدونه کوي، خو د طالبانو چارواکي دا تور ردوي.

دواړو هېوادونو ترمنځ پوله د تېرې اکتوبر میاشتې له خونړۍ جګړې وروسته تر ډېره بنده پاتې ده، چې له امله یې دوه اړخیزه سوداګري هم په ټپه ولاړه ده.