د ایران ولسمشر پاپ لیو څوارلسم ته په یوه پیغام کې "د ایران پر وړاندې د وروستیو پوځي تېریو په اړه" د کاتولیکانو د مشر د "اخلاقي دریځ" ستاینه کړې ده.
د ایران دولتي رسنیو د شنبې په ورځ خبر ورکړ چې د دغه هېواد ولسمشر مسعود پزشکیان پاپ لیو څوارلسم ته په یوه پیغام کې ویلي، ایران "ډیپلوماسۍ او سوله ییزو حل لارو ته ژمن پاتې کېږي."
د ایرنا خبري اژانس د راپور له مخې، پزشکیان همداراز "د ایران پر وړاندې د وروستیو پوځي تېریو په اړه" د کاتولیکانو د مشر د "اخلاقي او منطقي دریځ" له امله د تهران مننه څرګنده کړه.
ولسمشر وویل، ایران "د مشروعې دفاع په چوکاټ کې" د امریکا او اسرائیلو هدفونه په نښه کړل او پر نړیوالې ټولنې یې غږ وکړ چې "د امریکا د غیر قانوني کړنو پر وړاندې مسؤلانه اقدام وکړي."
سیمه ییزه ترینګلتیا وروسته له هغه زیاته شوه چې د فبرورۍ پر ۲۸مه امریکا او اسرائیلو پر ایران بریدونه وکړل. په ځواب کې، تهران پر اسرائیلو او په خلیج کې د امریکا پر متحدینو د بریدونو او د هرمز تنګي په تړلو سره ځوابي اقدام وکړ.
د اپرېل پر ۸مه د پاکستان په منځګړیتوب یو اوربند پلی شو، خو په اسلام اباد کې خبرو اترو کومه تلپاتې هوکړه رامنځته نه کړه. وروسته د امریکا ولسمشر ډونالډ ټرمپ دغه اوربند د نامعلومې مودې لپاره وغځاوه.
