اسرائیلي رسنۍ - د ټرمپ د ایران په اړه د ضرب الاجل په نږدې کېدو سره اسرائیل د لوی تاوتریخوالي لپاره چمتووالی نیسي

د اسرائیلو عامه رسنۍ KAN راپور ورکړ چې اسرائیل د ایران د انرژۍ او زیربناوو په اهدافو د ګډو بریدونو لپاره د امریکا لخوا "شنه څراغ" ته انتظار باسي. 

د اسرائیلي رسنیو په وینا، اسرائیل د هرمز تنګي د بیا پرانیستلو لپاره د امریکا د ولسمشر ډونالډ ټرمپ لخوا د ټاکل شوي ضرب الاجل له پای ته رسیدو وروسته د ایران په وړاندې د لوی تاوتریخوالي لپاره چمتووالی نیولی دی.

عامه خپرندویه  KAN، د یوې نامعلومې اسرائیلي سرچینې په حواله، ویلي چې ارزونې ښیي چې ټرمپ ممکن د سه شنبې په ورځ د ضرب الاجل له پای ته رسیدو وروسته د ایران په وړاندې بریدونه زیات کړي.

سرچینې ویلي چې اسرائیل د امریکا سره په ګډه د ایران پر ملي زیربناوو د لویو بریدونو د پیل لپاره چمتووالی نیسي.

سرچینې وویل: “موږ د ضرب‌الاجل له پای ته رسېدو وروسته په ایران کې د لوی تاوتریخوالي لپاره چمتو یو او د امریکا د اجازې په تمه یو.”

په هرصورت، په اسرائیل کې اندیښنې شتون لري چې ټرمپ ممکن په وروستۍ شیبه کې د اوربند د پلي کولو پریکړه وکړي. 

د ضرب‌الاجل فشار

د اسرائیلو بې نومه چارواکو KAN ته دا هم وویل چې هیواد یې د انرژۍ پورې اړوند او زیربنایی اهدافو د برید لپاره د "شنه څراغ" تمه لري.

تمه کیږي چې لومړی وزیر بنیامین نتنیاهو د دوشنبې په ورځ وروسته له لوړپوړو دفاعي چارواکو سره یوه محدوده امنیتي غونډه وکړي ترڅو د احتمالي برید په اړه خبرې وکړي.

ټرمپ ایران ته د سې شنبې د شپې تر ۸ بجو پورې وخت ورکړی چې د هرمز تنګی بېرته پرانیزي او هوکړې ته ورسېږي، که نه نو د انرژۍ پر زیربناوو به له بریدونو سره مخ شي.

سیمه ‌ییز تاوتریخوالی هغه وخت زیات شو کله چې امریکا او اسرائیل د فبرورۍ په ۲۸مه پر ایران ګډه جګړه پیل کړه، چې تر اوسه یې له ۱۴۰۰ زیات کسان وژلي، چې په کې د هغه وخت ستر مشر علي خامنه ای هم شامل وو.

تهران په ځواب کې د بې ‌پیلوټه الوتکو او توغندیو بریدونه وکړل چې اسرائیل، اردن، عراق او د خلیج هېوادونه یې په نښه کړل.