د ایران په بریدونو کې د سمون او لګېدو په کچه کې د روسیې مرستې هم اغېزمنې وې.
د CNN د راپور له مخې، چې د امریکايي استخباراتي ارزونو په اړه د معلوماتو لرونکو سرچینو په حواله یې خپور کړی، د چینايي ډلو لخوا برابرې شوې د سپوږمکۍ انځورونه او نور جغرافیایي معلومات د دې لامل شوي چې په وروستیو میاشتو کې د ایران د هدف ټاکلو وړتیا پرمختګ وکړي.
سرچینو دا هم ویلي چې یادو معلوماتوایران ته زمینه برابره کړه ترڅو په اردن کې پر هغه امریکايي اډه برید وکړي چې په ترڅ کې یې درې امریکايي سرتېري وژل شوي وو.
سرچینو زیاته کړه چې د چین لخوا چمتو شویو جیو سپیشل (ځمکنیو-فضاوي) معلوماتو د هرمز په تنګي کې د کښتیو د څارنې لپاره د ایران وړتیا نوره هم پیاوړې کړې، او په وینا یې، د دې کار له امله د ایران د توغندیو او بې پیلوټه الوتکو (ډرونونو) لخوا د خپلو اهدافو د ویشتلو احتمال زیات شوی دی.
سرچینو څرګنده کړه چې د ایران په بریدونو کې د هدف لګېدو د لوړې کچې تر شا د چین له ملاتړ سربیره د روسیې مرستې هم اغېزمنې وې، او همدارنګه یې زیاته کړه چې په نښتو کې د ایراني ځواکونو ترلاسه شوې تجربې هم په دې برخه کې رول لوبولی دی.
سرچینو څرګنده کړه چې د چین د ملاتړ د کچې په اړه دقیق مالومات ترلاسه کول ستونزمن دي، او دا لا تر اوسه روښانه نه ده چې ایا دا چارې د بیجینګ د مستقیم امر پر بنسټ ترسره شوې او که حکومت ورته یوازې پټه اجازه ورکړې ده.
په واشنګټن کې د چین او ایران سفارتونو د دې راپور په اړه د نظر ورکولو غوښتنې ته کوم ځواب نه دی ویلی.
