د نیویارک ښار د اور وژنې ادارې د اور وژنې کمېشنرې لیلیان بونسیګنور خبریالانو ته وویل، چې د ودانۍ د جوړښت د نړېدو پېښه د ځايي وخت د مازدیګر شاوخوا ۴ بجو او ۱ دقیقې، د فلېټبوش واټ په ۱۳۲۱ شمېره کې رامنځته شوه، چې سمدلاسه د بیړنیو خدماتو کارکوونکي او د ژغورنې ډلې سیمې ته ورسیدې.
بونسیګنور وویل، د استوګنې په ودانۍ کې دننه ګڼ شمېر اوسېدونکي او د ګاونډي ساختماني ځای کارکوونکي د ودانۍ تر نړېدلو وروسته د کنډوالو لاندې بند پاتې شوي وو.
هغې وویل: «موږ ۱۹ ټپیان لرو. له بده مرغه، دوه کسان مړه شوي، څلور یې په نازک روغتیايي حالت کې دي، د ۱۲ کسانو روغتیايي حالت ثابت دی او همدارنګه یو اور وژونکی هم لږ ټپي شوی دی. په دغو ۱۹ کسانو کې اووه ماشومان شامل دي.»
د لټون او ژغورنې عملیات
د ښار د ودانیو څانګې وویل چې د دوی تفتیش کونکي په سیمه کې وو "د بیا رغونې عملیاتو کې مرسته کوي او د نږدې ودانیو ساختماني ثبات تفتیشونه ترسره کوي."
د تلویزیون انځورونو ښودلي چې لسګونه بیړني موټرونه د پیښې ځای ته نږدې ګرځي، اور وژونکو د ژوندي پاتې شویو کسانو د موندلو لپاره له برقي اره ګانو او پلټونکو سپو څخه کار اخلي.
د چهارشنبې تر ماښامه پورې د بېړنیو مرستو کارکوونکو په ټوله سیمه کې د لټون او ژغورنې پراخ عملیاتو ته دوام ورکړ، په داسې حال کې چې چارواکو ویلي، لا یې په دقیقه توګه نه ده معلومه کړې چې د ودانۍ د نړېدو په سیمه کې څومره کسان لا هم ورک دي.
