د امریکا ولسمشر ډونالد ټرمپ ایران په پوځي برید وګواښه

ټرمپ وویل چې 'مسلح او چمتو یو'؛ که ایران 'سوله ییز' لاریون کوونکي ووژني، امریکا به اقدام وکړي.

د امریکا ولسمشر ډونالډ ټرمپ خبرداری ورکړی چې که ایران "سوله ییز لاریون کوونکي په ډزو او تاوتریخوالي سره ووژني"، واشنګټن به مداخله وکړي، او ویې ویل چې د امریکا متحده ایالات "مسلح او اقدام ته چمتو دي."

ټرمپ د جمعې په ورځ پر خپلې 'ټروت سوشل' ټولنیزې رسنۍ ولیکل: "که ایران سوله ییز لاریون کوونکي په ډزو او تاوتریخوالي سره ووژني، کوم چې د هغوی عادت دی، د امریکا متحده ایالات به یې مرستې ته ورودانګي. موږ مسلح او اقدام ته چمتو یو. دې موضوع ته ستاسو د پاملرنې څخه مننه!"

لاریونونه د ډسمبر په ۲۸مه د تهران په لوی بازار کې د بهرنیو اسعارو پر وړاندې د ایراني ریال د ارزښت د چټکې راټیټېدو او د اقتصادي وضعیت د خرابېدو له امله پیل شول، او وروسته د هېواد څو نورو ښارونو ته هم وغځېدل. په دغو لاریونونو کې د لږ تر لږه پنځو کسانو د وژل کېدو راپور ورکړل شوی دی.

د ټرمپ د څرګندونو په ځواب کې، د ایران د ملي امنیت د عالي شورا منشي او د پارلمان پخواني رئیس، علي لاریجاني، د جمعې په ورځ پر 'اېکس' ټولنیزه شبکه ادعا وکړه چې اسرائیل او امریکا دغو لاریونونو ته لمن وهي، خو په دې اړه یې کوم ثبوت وړاندې نه کړ.

لاریجاني پر اېکس، چې د ایران حکومت بند کړی، ولیکل: "ټرمپ باید پوه شي چې په کورنیو ستونزو کې د امریکا مداخله په ټوله سیمه کې د ګډوډۍ او د امریکا د ګټو د تباهۍ لامل کیږي." "د امریکا خلک باید پوه شي چې ټرمپ دا ماجراجويي پیل کړې ده. هغوی باید د خپلو سرتېرو غم وخوري."

د لاریجاني څرګندونې ښايي په سیمه کې د امریکا پراخ پوځي شتون ته اشاره وي. ایران د جون په میاشت کې د امریکا لخوا د ایران پر دریو اټومي تاسیساتو له بریدونو وروسته په قطر کې پر العدید هوايي اډې برید کړی و.

خرابېدونکی اقتصادي وضعیت

د ایران نیمه رسمي خبري اژانس فارس او د هنګاو بشري حقونو ډلې په هېواد کې د لاریون کوونکو او امنیتي ځواکونو ترمنځ په نښتو کې د لاریونونو اړوند د مرګ ژوبلې راپور ورکړی. د ایران په سوېل لوېدیځ کې د لردګان په ښار کې دوه کسان وژل شوي، په داسې حال کې چې فارس خبري اژانس ویلي درې نور په ازنا او یو بل په کوهدشت کې وژل شوي دي.

دغه اژانس د یوه نامعلوم ځايي چارواکي له قوله د پنجشنبې په ورځ راپور ورکړ چې د چهارمحال او بختیاري په لردګان سیمه کې له ۱۵۰ ډېر کسان راټول شوي وو، د حکومت ضد شعارونه یې ورکول او پر دولتي ودانیو یې ډبرې غورځولې.

دغه چارواکي وویل: "وروسته له هغه چې پولیسو مداخله وکړه، ځینو لاریون کوونکو پر امنیتي ځواکونو ډزې وکړې، چې یو شمېر افسران یې ټپیان کړل، په داسې حال کې چې د نښتو پر مهال دوه کسان ووژل شول."

ولسمشر مسعود پزشکیان هم د خلکو نارضایتي منلې، ویلي یې دي چې حکومت د اوسنیو اقتصادي ستونزو مسؤل دی او پر چارواکو یې غږ کړی چې بهرني عوامل لکه امریکا ملامته نه کړي.