د ټرمپ ادارې د ۴۴۳ فدرالي ملکیتونو یوه لیست خپور کړی چې ویل کېږي ممکن بند یا وپلورل شي. په دې لست  کې د FBI مرکزي دفتر او د عدلیې وزارت مرکزي ودانۍ هم شاملې دي. د ټرمپ حکومت وايي چې دا ملکیتونه د حکومت د عملیاتو لپاره اړین او ګټور ندي.

دغه لیست د سه شنبې په ورځ د عمومي خدماتو ادارې (GSA) لخوا خپور شو، چې د هېواد ځینې ډېر پېژندل شوي ودانۍ پکې شاملې دي او نږدې په هر ایالت کې شتون لري. په دې ملکیتونو کې د محکمې ودانۍ، د دفترونو ودانۍ او د موټرو پارکینګ ځایونه شامل دي.

په واشنګټن ډي سي کې، دغه لیست د FBI مرکزي دفتر  چې د جې ایډګر هوور ودانۍ ، د رابرت ایف کینیډي د عدلیې وزارت ودانۍ، د پوست پخوانۍ   ودانۍ چې یو وخت پکې ولسمشر ډونالډ ټرمپ هوټل چلولی و، او د امریکا سور صلیب مرکزي دفتر هم  شامل دي.

د امریکا د عمومي خدماتو ادارې په وینا "پلور دا یقیني کوي چې د مالیه ورکوونکو پیسې نور په خالي یا لږ کارېدونکو فدرالي ځایونو باندې نه مصرفېږي."

د دې ملکیتونو پلور د ټرمپ د فدرالي حکومت د تصرف د  هڅو یوه برخه ښکاري، چې د ټیکنالوژۍ میلیاردر ایلون ماسک لخوا رهبري کېږي. د دې تصرف هڅو له امله تر اوسه ۱۰۰,۰۰۰ کارکوونکو ته د استعفا وړاندیز شوی یا له دندو ګوښه شوي دي.

د حکومت د موثریت څانګې (DOGE) ادعا کړې چې تر اوسه یې ۱۰۵ میلیارده ډالر سپما کړي، چې یوه برخه یې د حکومتي ملکیتونو د کرایې تړونونو لغوه کولو له لارې ترلاسه شوې ده.

د بودیجې کارپوهانو د  حکومت د موثریت څانګې (DOGE)  د معلوماتو د اعتبار په اړه شک څرګند کړی دی.

د  امریکا د عمومي خدماتو ادارې په یوه بیان کې ویلي چې نور د دې تمه نه شي کولی چې د دې ملکیتونو د نوي کولو لپاره پیسې ترلاسه کړي او ویلي یې دي چې پلور ممکن په کلني ډول له ۴۳۰ میلیونه ډالرو څخه زیات د عملیاتو لګښتونه وسپموي.

دا لا روښانه نه ده چې د امریکا د عمومي خدماتو ادارې په لیست کې څومره ودانۍ به په پای کې د پلور لپاره وړاندې شي، یا دا چې څه ډول قیمت به ترلاسه کړي.

په دې لیست کې د څو لویو حکومتي ادارو مرکزي دفترونه شامل دي، لکه د پخوانیو سرتېرو اداره، د کرنې وزارت، د انرژۍ وزارت، د کار وزارت، د روغتیا او بشري خدماتو وزارت، د کور جوړونې او ښاري پرمختګ وزارت، او د فدرالي هوايي چلند اداره.

د امریکا د عمومي خدماتو ادارې خپل مرکزي دفتر هم په دې لیست کې شامل دی.

په دې لیست کې د شیکاګو، اټلانټا او کلیولینډ لوړپوړې ودانۍ، او همدارنګه د داخلي عوایدو خدمت (IRS) څو مرکزونه شامل دي چې د مالیاتو راپورونه پروسس کوي.

IRS په یوه داخلي یادداشت کې تېره اوونۍ ویلي و چې دغه ودانۍ به د جون میاشتې څخه پلور ته وړاندې شي.وړاندې کړي، وروسته له دې چې د اپرېل د مالیاتو د ثبتولو فصل بشپړ شي.