د امریکا ولسمشر وايي چې د هغه د منځګړو ټیم به هر ځل د ۱۸ ساعتونو لپاره د کاغذ د یوې ټوټې د لیدلو لپاره الوتنه ونه کړي، او وايي چې خبرې اترې به "د ټیلیفوني له لارې" ترسره شي.

د امریکا ولسمشر ډونالډ ټرمپ ویلي چې له ایران سره روانې خبرې اترې اوس د ټیلیفون له لارې ترسره کېږي.

ټرمپ د چهارشنبې په ورځ په سپینه ماڼۍ کې خبریالانو ته وویل: "موږ اوس له هغوی سره خبرې کوو، او نور هر ځل د یوه سند د لیدو لپاره ۱۸ ساعته الوتنې نه کوو. موږ دا خبرې د ټیلیفون له لارې ترسره کوو."

ایران او امریکا د اپرېل په ۱۱مه د پاکستان په پلازمېنه اسلام ‌اباد کې خبرې وکړې، خو ونه توانېدل چې هغه جګړه پای ته ورسوي چې د فبرورۍ په ۲۸مه پیل شوې وه.

دا مذاکرات د دوه اوونیو اوربند وروسته ترسره شول، چې د اپرېل په ۸مه د پاکستان لخوا منځګړیتوب شوی و، او وروسته د ټرمپ لخوا وغځول شو. ټرمپ همداراز د ځانګړي استازي سټیو ویټکوف او جیرډ کوشنر هغه پلان شوی سفر لغوه کړ چې ټاکل شوې وه د همدې اونۍ په پای کې اسلام‌اباد ته ولاړ شي.

ټرمپ ومنله چې هغه عموماً مخامخ ناستې غوره ګڼي.

هغه وویل: "زه تل مخامخ لیدنه خوښوم، ځکه زما په اند دا غوره ده. خو کله چې هر ځل د یوې ناستې لپاره ۱۸ ساعته الوتنه کوې، او ته پوهېږې چې ناسته به د څه په اړه وي، دا بې ‌معنا ده."

هغه بیا ټینګار وکړ چې هر ډول موافقه به په ایران پورې اړه ولري چې په بشپړ ډول د اټومي وسلو د تمو څخه لاس واخلي.