امریکا او سویلي کوریا د اټومي انرژۍ په برخه کې همکاري لا پسې پراخوي .

د سویلي کوریا د  بهرنیو چارو وزیر چو هیون ویلي دي چې د اوبتلونو همکاري به د مخنیوي ځواک پیاوړی کړي او له امریکا سره به ائتلاف لا ټینګ کړي، په داسې حال کې چې سېول همدارنګه تر ۲۰۳۸ کال پورې د پاکې انرژۍ د اړتیا د پوره کولو لپاره د دوو نوو اټومي رېکټرونو د جوړولو پلانونه اعلان کړي دي.

د سویلي کوریا د  بهرنیو چارو وزیر چو هیون د دوشنبې په ورځ وویل چې د سویلي کوریا هڅه چې اټومي ځواک لرونکې اوبتلونه ترلاسه کړي، د امریکا سره به د ائتلاف پیاوړتیا کې مرسته وکړي، ځکه چې دا به د سېول د مخنیوي وړتیاوې لوړې کړي.

د یونهاپ خبري اژانس راپور ورکړ چې چو دا څرګندونې د امریکا د جګړې وزارت د پالیسۍ مرستیال وزیر، البریج کولبي، سره د سهارنۍ ناستې پر مهال وکړې. 

کولبي په همدې اونۍ کې سېول ته سفر کړی، وروسته له هغې چې پنټاګون د ملي دفاع نوې ستراتیژي خپره کړه، چې پکې د کوریا ټاپووزمې او نورو ائتلافي مسایلو په اړه د پالیسۍ لارښود شامل دی.

د وزارت په یوه بیان کې ویل شوي: «وزیر چو په ځانګړي ډول یادونه وکړه چې د اټومي ځواک لرونکو اوبتلونو همکاري به د سویلي کوریا د مخنیوي وړتیاوو په پیاوړتیا سره له امریکا سره ائتلاف کې مرسته وکړي، او د کاري کچې خبرو اترو له لارې د عملي پلي کولو د مشخصو ګامونو پر اړتیا یې ټینګار وکړ.»

کولبي د سویلي کوریا ژمنتیا وستایله او دغه هېواد یې د «بېلګې وړ متحد» په توګه یاد کړ، چې د خپلو دفاعي وړتیاوو د پیاوړتیا له لارې د کوریا ټاپووزمې په دفاع کې د مخکښ رول لوبولو ته چمتو دی.

هغه زیاته کړه چې د امریکا د جګړې وزارت به فعاله ونډه واخلي ترڅو ډاډ ترلاسه شي چې د سرمشریزې په خبرو کې شوې مهمې هوکړې په چټکۍ سره عملي شي.

د تېر کال په نومبر میاشت کې، سویلي کوریا او امریکا د سوداګرۍ یو تړون لاسلیک کړ چې پکې د امریکا د بېړۍ جوړونې په سکتور کې د سویلي کوریا ۱۵۰ میلیارده ډالره پانګونه شامله ده، او دواړو هېوادونو هوکړه وکړه چې د اټومي ځواک لرونکو اوبتلونو د جوړولو په برخه کې «مخ ته ولاړ شي».

د دغه تړون له مخې، سویلي کوریا به د بېړۍ جوړونې، مصنوعي ځیرکتیا او اټومي صنعت په برخو کې له واشنګټن سره د نوي مشارکت په چوکاټ کې اټومي ځواک لرونکې اوبتلونه جوړ کړي.

په یوه اړونده پرمختګ کې، د سویلي کوریا د دفاع وزارت وویل چې د امریکا نوې دفاعي ستراتیژي د سېول پر خپلو وړتیاوو ټینګار کوي ترڅو د کوریا ټاپووزمې په امنیت کې لا زیات «مخکښ رول» ولوبوي.

د ملي دفاع ستراتیژۍ ویلي چې سویلي کوریا د دې وړتیا لري چې د شمالي کوریا د مخنیوي لپاره «اصلي» مسوولیت پر غاړه واخلي، په داسې حال کې چې د امریکا ملاتړ به «مهم، خو محدود» وي.

سویلي کوریا به دوه نوي اټومي رېکټرونه جوړ کړي

په همدې حال کې، سویلي کوریا هم د دوشنبې په ورځ اعلان وکړ چې د پاکې انرژۍ د مخ پر زیاتېدونکې غوښتنې په ترڅ کې به تر ۲۰۳۸ کال پورې دوه نوي اټومي رېکټرونه جوړ کړي.

د سېول په یوه خبري غونډه کې د اقلیم وزیر کیم سونګ‌ وان وویل، حکومت به د تېر حکومت له خوا د جوړ شوي ۱۱م اساسي پلان له مخې، د ۲۰۳۷–۲۰۳۸ کلونو ترمنځ د دوو لویو اټومي رېکټرونو د جوړولو لپاره اړینې چارې بشپړې کړي.

هغه وویل چې د انرژۍ په سکتور کې د کاربن د اخراج د کمولو لپاره، اړینه ده چې د سکرو او مایع طبیعي ګاز له لارې د برېښنا تولید راکم شي.

هغه زیاته کړه: «له همدې امله، موږ داسې د برېښنا د سیستم چلولو ته اړتیا لرو چې د نوي کېدونکې انرژۍ او اټومي برېښنا پر محور ولاړ وي.»

تېره اوونۍ، د حکومت له خوا د سپارل شوو دوو عامه نظرپوښتنو وښودله چې په اوسط ډول ۸۰ سلنه ګډونوالو ویلي چې اټومي برېښنا ته اړتیا شته، او ۶۰ سلنه یې د اضافي جوړونې له پلان څخه ملاتړ کړی دی.

د کوریا د هایدرو او اټومي انرژۍ دولتي شرکت (KHNP) به ډیر ژر د داوطلبۍ پروسه پیل کړي ترڅو تر ۲۰۲۷ پورې د دواړو ریکټرونو لپاره کوربه ښارونه یا ښارګوټي غوره کړي.

د وزارت د معلوماتو له مخې، KHNP) ) موخه لري چې تر ۲۰۳۱ کال پورې د اټومي خوندیتوب د څار ادارې منظوري ترلاسه کړي، ترڅو د ۲۰۳۷–۲۰۳۸ کلونو ترمنځ د جوړولو چارې بشپړې کړي.