د تورکیې د ولسمشر رجب طیب اردوغان او د هغه د قزاقستاني سیال قاسم جومارت توکایوف ترمنځ له خبرو اترو وروسته د انرژۍ، دفاع، زیربنا، زده کړو، رسنیو او پانګونې په برخو کې تړونونه لاسلیک شول.

تورکیې او قزاقستان آستانې ته د ولسمشر رجب طیب اردوغان د سفر په ترڅ کې د پانګونې، انرژۍ، دفاع، زده کړو، رسنیو او زیربنا په برخو کې ۱۳ تړونونه لاسلیک کړل.

اردوغان او د هغه قزاقستاني سیال قاسم جومارت توکایوف د پنجشنبې په ورځ په آستانه کې د استقلال په ماڼۍ کې د دوه اړخیزو خبرو او د تورکیې-قزاقستان د لوړ پوړې ستراتیژیکې همکارۍ شورا د شپږمې غونډې وروسته د ۱۳ تړونونو پر لاسلیک څارنه وکړه.

د لاسلیک شویو تړونونو په منځ کې "د تورکیې جمهوریت او قزاقستان جمهوریت ترمنځ د ابدي دوستۍ او ملګرتیا اعلامیه" هم وه، چې په مستقیم ډول د اردوغان او توکایوف له خوا لاسلیک شوه.

دواړو هیوادونو د پانګونې د متقابلې ودې او ملاتړ په اړه یو تړون او همدارنګه د تورکیې او قزاقستان د حکومتونو ترمنځ د کلتوري مرکزونو د جوړولو، فعالیت او تنظیم په اړه یو تړون هم لاسلیک کړ.

د تورکیې او قزاقستان ترمنځ په مدني چارو کې د حقوقي مرستو د تړون د تعدیل یو پروتوکول هم لاسلیک شو.

نور تړونونه

په نورو تړونونو کې د تورکیې د کلتور او ګرځندوی وزارت او د قزاقستان د ساینس او لوړو زده کړو وزارت ترمنځ د بورسونو یو ګډ پروګرام او د قزاقستان د ښوونې او روزنې وزارت او د تورکیې د ملي پوهنې وزارت ترمنځ په قزاقستان کې د تورکیې د معارف بنسټ د دوو ښوونځیو د پرانستلو په اړه د هوډ یو یادښت شامل وو.

د قزاقستان حکومت او TAV Holding شرکت د الماتې نړیوال هوایی ډګر په اړه د پانګونې یو تړون لاسلیک کړ، په داسې حال کې چې Samruk-Kazyna او ترکي شرکت YDA Insaat د روغتونونو د جوړولو د پروژو د تمویل په اړه د همکارۍ یو تړون لاسلیک کړ.

د قزاقستان د ملي راډیو تلویزیون او د تورکیې د دولتي ملي ټلویزیون (TRT) ترمنځ په راډیو او ټلویزیوني خپرونو کې د تفاهم یو یادښت لاسلیک شو.

KazMunayGas او د تورکیې د پټرولیم شرکت (TPAO) دوه جلا تړونونه لاسلیک کړل، چې په کې د تیلو د ساحو د خدماتو په اړه د همکارۍ یو تړون او د تیلو او ګازو د پروژو د ګډې پراختیا په اړه د تفاهم یادښت شامل وو.

د آستانه نړیوال مالي مرکز او د استانبول مالي مرکز هم د تفاهم یو یادښت لاسلیک کړ.

په دفاعي سکتور کې، دواړو لورو د "عنقا بې پیلوټه الوتکو د تولید او ساتنې لپاره د یوه ګډ شرکت په جوړولو هوکړه وکړه.