په امریکا کې د کانګرس د استازو جرګې سومالیايي الاصله دیموکراتې غړې، الهان عمر، ویلي چې زوی یې د کورني امنیت وزارت د کډوالۍ او ګمرکونو د ساتنې ادارې  د مامورینو لخوا درول شوی او وروسته له هغه چې خپل پاسپورټ یې ورښودلی، خوشې شوی دی.

د CBS نیوز د راپور له مخې، الهان عمر ویلي چې زوی یې له یوه پلورنځي څخه تر راوتلو وروسته د د کډوالۍ او ګمرکونو د ساتنې ادارې  مامورینو لخوا ودرول شو. هغې زیاته کړه چې زوی یې وروسته له هغه خوشې شو چې خپل پاسپورټ یې وړاندې کړ.

عمر وویل چې د د کډوالۍ او ګمرکونو د ساتنې ادارې  مامورین مخکې هم هغه جومات ته ورغلي وو چېرته چې یې زوی لمونځ کوي، خو پرته له کومې پېښې له هغه ځایه وتلي وو. هغې څرګنده کړه چې زوی یې "د دې لپاره چې ونه درول شي، خپل پاسپورټ تل له ځان سره ګرځوي."

الهان عمر د کډوالۍ او ګمرکونو د ساتنې ادارې  په "توکمیز پروفایلینګ" تورن کړ او ویې ویل: "دوی داسې ځوانان لټوي چې د سومالیايي په څېر ښکاري او فکر کوي چې اسناد نه لري."

د امریکا ولسمشر ډونالډ ټرمپ د نومبر په ۲۲مه په خپله ټولنیزه پاڼه کې اعلان کړی و چې په مینیسوټا ایالت کې د سومالیايي کډوالو لپاره د "لنډمهاله خوندیتوب حالت" پروګرام پای ته رسوي.

ټرمپ د ډسمبر په ۳مه په خپلو څرګندونو کې سومالیا "په سختۍ یو هېواد" بللی و او ویلي یې وو چې نه غواړي د دې هېواد کډوال په امریکا کې پاتې شي. هغه الهان عمر هم "بې کفایته، ناوړه او کثافات" بللې وه.

ټرمپ ادعا کړې وه چې په امریکا کې مېشتو سومالیايي کډوالو مینیسوټا ایالت "وران" کړی او ویلي یې وو چې الهان عمر هم باید "له هېواده وشړل شي."

الهان عمر په خپلې ټولنیزې پاڼې کې په ځواب کې لیکلي وو: "ټرمپ ته زما پیغام دا دی: ستا له کرکې ډکې خبرې به کار ورنکړي. سومالیايي امریکایان به دلته پاتې شي."

لنډمهاله خوندیتوب حالت
ټرمپ، چې د خپلې واکمنۍ له پیل راهیسې یې د هیټي، وینزویلا او افغانستان په څېر هېوادونو لپاره د لنډمهاله خوندیتوب حالت د لغوه کولو لپاره ګامونه اخیستي، د هغه ځینې دا هڅې له قضايي خنډونو سره مخ شوې دي.

لنډمهاله خوندیتوب حالت کډوالو ته په هېواد کې د کار کولو اجازه ورکوي او د دوی د شړلو مخه نیسي.