کوشنر او ویټکوف د شنبې په ورځ له مسکو څخه په داسې حال کې رخصت شول چې له ولادیمیر پوتین سره یې په درې ساعته خبرو کې د جګړې د حل په اړه د کوم ښکاره پرمختګ نښه نه وه ښودلې.

د امریکا د ولسمشر ډونالډ ټرمپ په منځګړیتوب د سولې پخوانيو پړاوونو ډېره لږه پایله درلوده. ټرمپ، چې د جګړې د چټک پای ته رسولو په ژمنې سره یې انتخاباتي مبارزه کړې وه، د جمعې په ورځ وویل چې امریکا یو نوی وړاندیز لري، خو په اړه یې نور جزییات ورنکړل.

پوتین د شنبې ورځې ناسته "خورا ګټوره" وبلله، بلخوا د سپینې ماڼۍ یوه چارواکي رسنیو ته ویلي چې په راتلونکو اونیو کې به راتلونکي ګامونه اعلان شي. دغو دوو استازو په کییف کې له زیلینسکي او نورو لوړپوړو اوکرایني چارواکو سره خبرې وکړې.

زیلینسکي، چې باور لري واشنګټن د سولې په هر ډول تړون کې کلیدي رول لوبوي، وویل چې د امریکا د راتلونکي دوبي له ټاکنو وړاندې د سولې لپاره یو فرصت شتون لري. هغه په ټولنیزو رسنیو کې لیکلي چې له خپل مذاکراتي ټیم سره یې چمتووالی نیولی او اوکراین د جګړې پای غواړي. زیلینسکي زیاته کړه: "امنیتي تضمینونو ته اړتیا ده. له جګړې وروسته یوې عزتمنې سولې ته اړتیا ده. زموږ وړاندیزونه چمتو شوي دي."

د بریدونو لنډمهاله درېدنه:
یوې باخبرې سرچینې رویټرز ته ویلي چې د بریتانیا، فرانسې او جرمني د ملي امنیت سلاکاران هم د یکشنبې په ورځ په کییف کې وو، خو دا یې ونه ویل چې هغوی په کومو ناستو کې ګډون کوي. ویټکوف او د ټرمپ زوم کوشنر تر دې وړاندې څو ځله د سولې د استازو په توګه مسکو ته تللي وو، خو دا کییف ته د امریکايي مذاکره کوونکو په توګه د دوی لومړنی سفر دی.

په تېرو خبرو کې، دواړه لوري د ډونباس سیمې د راتلونکي په ګډون په یو شمېر کلیدي مسایلو کې له یو بل څخه ډېر لرې پاتې شوي دي. روسیه غواړي چې اوکراین له هغو سیمو ووځي چې لا هم د کییف تر کنټرول لاندې دي، خو کییف دا غوښتنه رد کړې ده. د اوکراین لپاره، د خپلو اروپايي متحدینو او امریکا څخه د رښتینو امنیتي تضمینونو ترلاسه کول حیاتي دي ترڅو روسیه بیا پرې برید ونه کړي.

که څه هم د ځمکنۍ جګړې لومړۍ کرښې تر ډېره ثابتې پاتې دي، خو دواړو لورو په وروستیو اونیو کې لیرې واټن ویشتونکي هوايي بریدونه زیات کړي دي. روسیې په تېرو دوو اونیو کې د اوکراین پر پلازمېنه شپه او ورځ بریدونه کړي، چې په هغې کې د جمعې په ورځ د امنیتي ادارې (SBU) پر مرکزي دفتر برید هم شامل و. بلخوا اوکراین هم د دوبي په اوږدو کې د روسیې د تېلو پر تصفیه خانو او نورو تاسیساتو درانه بریدونه کړي دي.

کرملین اعلان کړی چې پر کییف بریدونه به تر دوشنبې پورې ودروي، او زیلینسکي هم ویلي چې اوکراین به پر مسکو بریدونه ودروي. خو اوکراین د یکشنبې په ورځ وویل چې د شپې په مهال یې د روسیې په خاوره کې ۴۸۰ کیلومتره دننه د "ریازان" د تېلو تصفیه خانه ویشتلې چې له امله یې هلته اور لګېدلی دی.