شمالي کوریا د «جګړې د مخنیوي ځواک» د پیاوړتیا لپاره د توغندیو او مرمیو د تولید د پراخولو هڅه کوي

د شمالي کوریا ولسمشر کیم جونګ اون چارواکو ته امر کړی چې د توغندیو تولید زیات کړي او د توغندیو لپاره د پوځ د مخ په زیاتیدونکې اړتیا پوره کولو لپاره نورې فابریکې جوړې کړي.

د شمالي کوریا دولتي رسنیو د جمعې په ورځ راپور ورکړ چې د شمالي کوریا مشر کیم جونګ اون د مهمو مهماتو د صنعت د تصدیو د تفتیش پر مهال د هېواد د توغندیو او مرمیو د تولید د ظرفیت د لا پراخولو غوښتنه کړې ده.

د کوریا مرکزي خبري اژانس (KCNA) په وینا، کیم د لوړپوړو چارواکو په ملتیا له مهمو مهماتو جوړوونکو تصدیو لیدنه وکړه او د فابریکو پر عصري کولو او د تخنیکي بنسټونو پر پیاوړتیا یې ټینګار وکړ، ترڅو د کوریا د ولسي پوځ عملیاتي اړتیاوې پوره شي.

پیونګ ‌یانګ په وروستیو کلونو کې د توغندیو ازموینې په څرګند ډول زیاتې کړې دي — چې شنونکي وایي موخه یې د دقیقو بریدونو د وړتیاوو ښه کول، د متحده ایالاتو او سویلي کوریا پر وړاندې ننګونه رامنځته کول، او د وسلو ازموینه مخکې لدې چې مهم متحد روسیې ته یې صادر کړي.

چارواکو کیم ته په ۲۰۲۵ کال کې د توغندیو او مرمیو د تولید د برخې د لاسته راوړنو په اړه معلومات ورکړل، چې پکې د څلورمې ربعي تولید هم شامل و.

د کوریا مرکزي خبري اژانس (KCNA) د فابریکو د موقعیتونو او د لیدنو د وخت په اړه جزیات نه دي ورکړي.

د کوریا مرکزي خبري اژانس د کیم له قوله ویلي: «اړینه ده چې د اړوندو تولیدي تصدیو تخنیکي بنسټونه په متوازن ډول پیاوړي شي، ترڅو د ټولیز تولید ظرفیت لا نور هم پراخ شي.»

کیم همدارنګه د ۲۰۲۶ کال لپاره د پرمختګ ‌محور تولیدي پلان پر اړتیا ټینګار وکړ، ترڅو د هېواد د توغندیو او توپچي ځواکونو راتلونکې عملیاتي اړتیاوې پوره شي.

کیم د نوو تصدیو د جوړولو او د موجوده فابریکو د لوړولو له لارې د مهماتو د صنعت د عصري کولو پر ارزښت ټینګار وکړ، او ویې ویل چې د توغندیو او مرمیو تولید د جګړې د مخنیوي ځواک په پیاوړتیا کې مرکزي رول لري.

د پنجشنبې په ورځ، د کوریا مرکزي خبري اژانس (KCNA) راپور ورکړ چې کیم د ۸۷۰۰ ټنه وزن لرونکې، د اټومي انرژۍ پر بنسټ د ستراتېژیک لارښود توغندیو یوې اوبتل کښتۍ، چې لا د جوړېدو په حال کې ده، تفتیش وکړ او د سویلي کوریا هغه پلانونه یې چې د امریکا په ملتیا د اټومي اوبتل کښتیو د پراختیا لپاره دي، «یوه تهاجمي کړنه» او د سیمې د ثبات پر وړاندې ګواښ وبلل.

د کوریا مرکزي خبري اژانس ویلي چې پیونګ ‌یانګ د لارښود توغندیو په وسلې سمبال، د اټومي انرژۍ پر بنسټ یوه اوبتل کښتۍ جوړوي، هغه پروژه چې لومړی ځل یې د مارچ په میاشت کې څرګنده کړه.