دفاعي لګښتونو پر سر د ټرمپ د تعرفو ګواښ ته د اسپانیا ځواب؛ خبرداری یې ورکړی چې دا به امریکایانو ته په زیان تمام شي

د اسپانیا د لومړي وزیر مرستیالې یولاندا دیاز وايي، هغه "سزا چې" د امریکا ولسمشر یې غواړي پر اسپانیا یې ولګوي، د امریکایانو لپاره به "ډېره ګرانه تمامه شي".

د اسپانیا حکومت د چهارشنبې په ورځ د امریکا د ولسمشر ډونالډ ټرمپ هغو څرګندونو ته سخت غبرګون وښود چې که اسپانیا خپل دفاعي لګښتونه زیات نه کړي نو تعرفې به پرې ولګوي، او خبرداری یې ورکړ چې دا ډول پالیسي به د امریکایي وګړو په زیان تمامه شي.

پارلمان ته په وینا کې، د اسپانیا د لومړي وزیر مرستیالې یولاندا دیاز وویل، هغه "سزا چې" د امریکا ولسمشر یې غواړي پر اسپانیا یې ولګوي، د امریکایانو لپاره به "ډېره ګرانه پرېوځي".

د هېواد د عامه خپرونې RTVE په حواله، هغې خبرداری ورکړ، "له امریکا سره د اسپانیا سوداګریز بیلانس کسر لري، چې دا په دې مانا ده چې دا پالیسۍ به امریکایانو ته زیان ورسوي."

ټرمپ په سپینه ماڼۍ کې خبریالانو ته وویل: "زه له اسپانیا ډېر ناخوښه یم. دا یوازینی هېواد دی چې خپله شمېره یې تر ۵ سلنې پورې نه ده لوړه کړې... نو زه له اسپانیا خوښ نه یم."

دیاز دا هم یاده کړه چې دوی باید د تېلو له صنعت، د موټرو له صنعت، او نورو اغېزمنو سکتورونو څخه دفاع وکړي، او زیاته یې کړه: "په اسپانیا کې واک د اسپانویانو په لاس کې دی؛ موږ د هغوی تحت الحمایه نه یو."

په ورته وخت کې، د بهرنیو چارو وزیر خوزې مانویل الباریس ناټو او یورو-اتلانتیک امنیت ته د خپل هېواد ژمنتیا بیا تکرار کړه او دا یې "له هر ډول شک څخه پورته" وبلله.

هغه د چهارشنبې په ورځ په چین کې خبریالانو ته وویل، اسپانیا "یو باوري متحد دی" چې د ختیځې اروپا په پوله کې یې په لوړه کچه ځواکونه ځای پر ځای کړي، چې د سیمې د امنیت لپاره "بنسټیز" رول لري.

د هغې له خوا، د ساینس وزیرې دیانا مورانټ وویل چې ټرمپ "معمولاً داسې ځینې څرګندونې کوي"، خو مهمه خبره دا ده چې "څو ورځې وړاندې له لومړي وزیر پېدرو سانچز سره، هغه خورا دوستانه و."