امریکا تایوان ته د ۳۳۰ میلیونه ډالرو په ارزښت د پوځي تجهیزاتو احتمالي پلور منظور کړ

د وسلو د دې احتمالي پلور اعلان وروسته له هغې کیږي چې ټرمپ او شي جین پینګ تیره میاشت په سویلي کوریا کې د سوداګریز تړون د خوندي کولو په هڅه کې سره ولیدل.

پنټاګون د پنجشنبې په ورځ ناوخته وویل، امریکا تایوان ته د ۳۳۰ میلیونه ډالرو په ارزښت د جنګي جټ الوتکو د پرزو او ترمیمي وسایلو احتمالي پلور منظور کړ. دا د جنورۍ په میاشت کې د ولسمشر ډونالډ ټرمپ له واک ته رسیدو راهیسې لومړی دا ډول احتمالي معامله ده.

پنټاګون په یوه بیان کې ویلي: "وړاندیز شوی پلور به د F-16، C-130 او نورو الوتکو د بیړۍ عملیاتي چمتووالي په ساتلو سره د اوسنیو او راتلونکو ګواښونو سره د مقابلې لپاره د ترلاسه کوونکي وړتیا لوړه کړي."

چین تایوان خپله خاوره ګڼي او د دې ټاپو د کنټرول لپاره یې د ځواک کارول نه دي رد کړي. د تایوان حکومت د بیجینګ د حاکمیت له ادعاوو سره سخت مخالفت کوي او وايي چې یوازې د تایوان خلک کولی شي د خپلې راتلونکې پریکړه وکړي.

ټرمپ وايي، د چین ولسمشر شي جین پینګ ورته ویلي چې د جمهوري غوښتونکي مشر د واکمنۍ پر مهال به پر تایوان برید ونه کړي.

واشنګټن له بیجینګ سره رسمي دیپلوماتیکې اړیکې لري، خو له تایوان سره غیر رسمي اړیکې ساتي او د دې ټاپو تر ټولو مهم د وسلو برابرونکی دی.