د امریکا د بهرنیو چارو وزیر مارکو روبیو او د چین د بهرنیو چارو وزیر وانګ د جمعې په ورځ په مالیزیا کې د لومړي ځل لپاره په مخامخ ډول لیدنه وکړه. دا لیدنه  په داسې حال کې کیږي چې د دواړو هېوادونو ترمنځ د سوداګرۍ، دفاع او نورو مسایلو په اړه کړکېچ زیات شوی دی.

د واشنګټن پوسټ په وینا، دغه غونډه به د جنوب ختیځې آسیا د هېوادونو د ټولنې (آسیان) د بهرنیو چارو وزیرانو د غونډې په څنډه کې ترسره شوه، چې په پلازمېنه کوالالمپور کې روانه ده.

که څه هم امریکا او چین د آسیان غړي نه دي، خو دواړه هېوادونه په دې وروستیو کې د جنوب ختیځې آسیا هېوادونو ته د نږدې کېدو هڅې کوي، په هرصورت، د سیمې ډیری هیوادونه د اړخونو د غوره کولو په اړه محتاط پاتې دي.

روبیو د پنجشنبې په ورځ څرګنده کړه چې غواړي له وانګ سره د اوکراین په جګړه کې د روسیې د ملاتړ په اړه د بیجینګ دریځ وڅېړي.

هغه وویل: "چینایان ښکاره د روسیې د هڅو ملاتړ کوي. زما په اند، دوی په عمومي ډول هڅه کړې چې تر هغه ځایه چې ممکنه وي له هغوی سره مرسته وکړي، پرته له دې چې ونیول شي." روبیو دغه څرګندونې وروسته له هغې وکړې چې د روسیې د بهرنیو چارو وزیر سرګي لاوروف سره یې خبرې وکړې.

روبیو، چې د ۱۴ کلونو لپاره د جمهوري غوښتونکو سناتور په توګه د چین په اړه سخت دریځ درلود، په ۲۰۲۰ کال کې د بیجینګ له خوا په تور لیست کې شامل شوی و او لا هم د چین د بندیزونو په لیست کې دی. روبیو د جنورۍ په میاشت کې، د بهرنیو چارو د وزیر په توګه د دندې له پیل وروسته، له وانګ سره د ټیلیفون له لارې خبرې کړې وې.