د امریکا په مینیاپولیس کې پر د کانګرس په غړې سومالیا الاصله ایلهان عمر د نامعلومو موادو له شیندلو وروسته یو سړی ونیول شو
د کانګرس استازې ایلهان عمر وروسته له هغه چې بریدګر سړی له خونې وایستل شو، خپلې غونډې ته دوام ورکړ.
یو سړی چې تور جاکټ یې اغوستی و، وروسته له هغه ونیول شو چې په مینیاپولیس کې یې د امریکا د استازو جرګې پر غړې ایلهان عمر د هغې په کوربه توب جوړه شوې یوه غونډه کې نامعلوم مواد وشیندل.
د سې شنبې په ورځ کله چې هغه ونیول شو او لاسونه یې شاته وتړل شول، حاضرینو چکچکې وکړې.
د پېښې په یوه ویډیو کې، په ګڼه ګوڼه کې د یو چا غږ اورېدل کېږي چې وايي، "ای خدایه، هغه پر دې یو څه وشیندل."
وروسته له هغه چې نوموړی له خونې وایستل شو، هغې خپلې غونډې ته دوام ورکړ.
د دې ګډوډۍ وروسته، عمر بېرته سټیج ته راغله او خپلو خبرو ته یې دوام ورکړ، سره له دې چې شاوخوا خلکو پرې ټینګار کاوه چې د معاینې لپاره له خونې ووځي، او د یوه کس غږ اورېدل کېده چې ویل یې د مایع بوی "ډېر بد" و.
عمر وویل: "موږ به خبرو ته دوام ورکړو. مهرباني وکړئ، مه پرېږدئ چې دوی ننداره جوړه کړي."
هغې زیاته کړه: "حقیقت دا دی چې د دې بدرنګه سړي په څېر خلک نه پوهېږي — موږ د مینه سوټا خلک غښتلي یو او د هر هغه څه په وړاندې به چې دوی یې زموږ پر لور راغورځوي، مقاومت وکړو."
عمر وویل: "ټول کښېنئ. زه به خپلې خبرې پای ته ورسوم،" او زیاته یې کړه: "زما لپاره مهمه ده چې د هغې (نوئم) د استعفا په غوښتنه کې د خپلو دیموکرات همکارانو مشرۍ ته دوام ورکړم."
"زه ځورونکو ته د بریا اجازه نه ورکوم"
له پېښې وروسته، عمر پر ایکس ټولنیزې رسنۍ خپلو پلویانو ته ډاډ ورکړ چې هغه ښه ده.
هغې پر ایکس ولیکل: "زه ښه یم. زه یوه ژوندۍ پاتې شوې یم، نو دا کوچنی لمسوونکی به ما له خپل کار کولو څخه ونه ډاروي."
"زه ځورونکو ته د بریا اجازه نه ورکوم."
هغې همدارنګه له خپلو رایه ورکوونکو څخه مننه وکړه چې د هغې ملاتړ یې کړی او تر شا یې درېدلي دي.
دا پېښه یوه ورځ وروسته له هغه وشوه چې ولسمشر ډونالډ ټرمپ ویلي وو د عدلیې وزارت د عمر په اړه څېړنې کوي، او د هغو راپورونو په استناد یې دا خبره وکړه چې په تېر کال کې د هغې خالص ارزښت په چټکۍ سره لوړ شوی، دا هغه ادعا ده چې هغې رد کړې ده.
دا څرګندونې د ټرمپ له خوا پر عمر وروستی برید دی او د هغو بیانونو د لړۍ یوه برخه ده چې په کې ولسمشر خپل سیاسي سیالان د دندې پر مهال په ناوړه کړنو تورن کړي دي.
