د مکسیکو په جنوب کې د پټلۍ نه د اورګاډي د وتو له امله ګڼ شمېر کسانو ته مرګ ژوبله اوښتې ده

چارواکو د ژغورنې عملیاتو لپاره ۳۶۰ سمندري پرسونل، ۲۰ موټرې، څلور ځمکني امبولانسونه، درې هوايي امبولانسونه او یوه تاکتیکي بې پیلوټه الوتکه ځای پر ځای کړې ده.

چارواکو ویلي، د مکسیکو په جنوبي ایالت اواکساکا کې د بین المحیطي اورګاډي د پټلۍ نه د وتو له امله لږ تر لږه ۱۳ کسان مړه او ۹۸ نور ټپیان شوي دي.

د سمندري ځواکونو سکرتریت ویلي چې د یکشنبې په ورځ ۳۶ تنه ټپیان روغتون ته وړل شوي او پاتې نورو ته سطحي ټپونه اوښتي دي.

دغه سکرتریت د هغو کسانو له کورنیو سره خپله ژوره خواخوږي څرګنده کړې چې خپل ژوند یې له لاسه ورکړی دی.

دغې ادارې یادونه کړې چې د لټون او مسافرو د موندلو عملیاتو لپاره یې ۳۶۰ سمندري پرسونل، ۲۰ موټرې، څلور ځمکني امبولانسونه، درې هوايي امبولانسونه او یوه تاکتیکي بې پیلوټه الوتکه ځای پر ځای کړې ده.

په خبرپاڼه کې راغلي: "دا اداره د خدمت کولو لپاره خپله ژمنتیا بیا تکراروي، د مکسیکو د خلکو د خوندیتوب او هوساینې په موخه کار کوي، او د حقایقو د روښانه کولو لپاره به د اړوندو چارواکو سره په همغږۍ توګه همکارۍ ته دوام ورکړي."

د مکسیکو ولسمشرې کلاډیا شینبام پر ټولنیزو رسنیو په یوه خپاره کړي پیغام کې ویلي: "د سمندري ځواکونو سکرتریت ماته خبر راکړی چې د بین المحیطي اورګاډي په پېښه کې، له بده مرغه، ۱۳ کسان مړه شوي؛ ۹۸ تنه ټپیان دي، چې د پنځو تنو روغتیايي حالت نازک دی. د ټپیانو درملنه د ماتیاس رومیرو او سالینا کروز په IMSS روغتونونو او همدارنګه د جوچیتان او ایکستپیک په IMSS-Bienestar روغتونونو کې روانه ده."

هغې زیاته کړه: "ما د سمندري ځواکونو وزیر او د کورنیو چارو وزارت د بشري حقونو مرستیال ته لارښوونه کړې چې سیمې ته سفر وکړي او د IMSS او IMSS-Bienestar له استازو سره یوځای په شخصي توګه د کورنیو څارنه وکړي."

"د کورنیو چارو وزیر هم  هڅې همغږي کوي. زه د اواکساکا د والي او د هغه د ټیم له ملاتړ څخه مننه کوم. موږ به د تازه معلوماتو وړاندې کولو ته دوام ورکړو."