د امریکا متحده ایالاتو ولسمشر ډونالډ ټرمپ ویلي چې د بریتانیا پاچا دریم چارلس ورسره موافق دی چې ایران باید اټومي وسله ونلري، هغه دا موضوع د منځني ختیځ د شخړې په اړه په هغو څرګندونو کې یاده کړه چې په سپینه ماڼۍ کې د بریتانیا د پاچا په ویاړ په جوړه شوې دولتي میلمستیا کې یې کولې.
دا مراسم د سې شنبې په ورځ، متحده ایالاتو ته د پاچا د څلور ورځني سفر په دویمه ورځ ترسره شول.
ټرمپ په میلمستیا کې وویل: "موږ دا مهال په منځني ختیځ کې یو څه کار کوو او ډېر ښه روان یو." هغه زیاته کړه: "موږ هغه ځانګړي مخالف ته په نظامي لحاظ ماتې ورکړې ده، او موږ به هېڅکله اجازه ورنکړو چې هغه مخالف اټومي وسلو ته لاس رسی ولري. پاچا چارلس په دې برخه کې له ما سره ډېر موافق دی — موږ به هېڅکله اجازه ورنکړو چې هغه مخالف اټومي وسله ولري."
پاچا چارلس د ټرمپ له خبرو وروسته پخپلو څرګندونو کې د ایران یا جګړې په اړه څه ونه ویل.
همداشان د انګلستان پاچا چارلس د امریکا کانګرس ته هم وینا وکړه .
هغه د متحده ایالاتو په کانګرس کې په خپله وینا کې د اوکراین د دفاع لپاره پر "نه ماتېدونکي هوډ" ټینګار وکړ او د ناټو ستاینه یې وکړه.
د انګلستان پاچا د روسیې سره په جګړه کې د اوکراین لپاره د متحده ایالاتو د دوامداره مرستو پر اهمیت او د انزوا غوښتنې پر خطرونو رڼا واچوله.
بریتانیا او متحده ایالاتو دواړو د کلونو په اوږدو کې پر دې دریځ ټینګار کړی چې تهران باید اټومي وسلې جوړې نکړي. تهران د دې وسلو د جوړولو هڅه ردوي خو وايي چې دوی د اټومي وسلو د نه خپراوي تړون د غړي په توګه حق لري چې د سوله ییزو موخو لپاره، د غني کولو په ګډون، اټومي ټکنالوژي پرمخ یوسي.
امریکا او اسرائیل د فبرورۍ په ۲۸مه پر ایران جګړه پیل کړه. تهران د دې بریدونو ځواب په سیمه کې د امریکا پر ګټو په بریدونو سره ورکړ، چې ډېری یې په خلیجي هېوادونو کې وو.
د اپرېل په ۸مه د پاکستان په منځګړیتوب یو اوربند اعلان شو، چې ورپسې د اپرېل په ۱۱-۱۲مه په اسلاماباد کې خبرې اترې وشوې، خو دا مذاکرات پرته له کومې هوکړې پای ته ورسېدل. ټرمپ وروسته وویل چې دا اوربند د تهران له خوا د یوه وړاندیز تر رارسېدو پورې د پاکستان په غوښتنه غځول شوی دی.
