د مسکو هوايي ډګرونه د نږدې ۶۰ ډرونونو له نسکورېدو وروسته د لنډ وخت لپاره وتړل شول
د روسیې د پلازمینې مسکو څلور واړه هوايي ډګرونه وروسته له هغه د لنډ وخت لپاره وتړل شول چې چارواکو وویل هوايي دفاعي سیسټمونو پلازمینې ته نږدې ۵۹ ډرون الوتکې ویشتلي دي. ورته مهال، په کریمیا کې د امنیتي اندېښنو له امله بېړني محدودیتونه لګول شوي دي.
د روسیې د هوايي چلند چارواکو د دوشنبې په ورځ د مسکو څلور هوايي ډګرونه وروسته له هغه د لنډ وخت لپاره وتړل چې د ډرون الوتکو یو برید شنډ کړای شو.
د مسکو ښاروال، سرګي سوبیانین په ټیلیګرام کې وویل چې ۵۹ ډرون الوتکې چې د ښار په لور روانې وې، له منځه وړل شوې دي. سوبیانین نور جزیات ورنکړل، خو زیاته یې کړه چې بېړني خدمات هغو سیمو ته استول شوي چې ډرون الوتکې پکې راغورځول شوې دي.
اوکراین د روسیې لخوا د خپلو ښارونو د بمبارۍ په بدل کې د روسیې خاورې ته ډرون الوتکې لېږي، که څه هم سوبیانین په ښکاره ونه ویل چې دا ډرون الوتکې له اوکراین څخه راغلې وې.
د هوانوردۍ څارونکې ادارې په جلا توګه وویل چې د شریمیتیو ، دومودیدوفو ، ونوکووا او د پلازمینې نږدې ژوکوفسکي هوايي ډګرونو الوتنې وځنډولې، خو وروسته بېرته پیل شوې. چارواکو اعلان وکړ چې سهار ۵:۳۹ بجې هوايي ډګرونه بېرته پرانیستل شول.
دا برید وروسته له هغه کېږي چې تېره اونۍ هم ډرون الوتکو د مسکو د تېلو پر یوازینۍ تصفیه خانه برید کړی و. په هغه برید کې، د مسکو دفاعي سیسټمونو نږدې ۲۰۰ ډرون الوتکې ویشتلې وې، چې دا په ۲۰۲۲ کال کې د روسیې او اوکراین د شخړې له پیل راهیسې پر دغه ښار یو له تر ټولو لویو هوايي بریدونو څخه و.
د روسیې لخوا الحاق شوې کریمیا کې، د سیواستوپول ښار والي میخایل رازوزایف په ټیلیګرام کې وویل چې د دوشنبې په ورځ یې په ازاده فضا کې ټول عامه مراسم لغوه کړي او د سړکونو څراغونه به بند وساتل شي. هغه له خلکو وغوښتل چې د برېښنا مصرف کم کړي.
کریمیا چې د روسیې د ګرځندویانو لپاره یو مشهور ځای دی، پر عامو خلکو او سوداګریو د تېلو پلورل هم بند کړي دي؛ تېل یوازې هغو دولتي ادارو ته ورکول کېږي چې د اړینو خدماتو او امنیت مسؤلیت لري.
