د پاکستان د بهرنیو چارو وزارت وايي، د خیبر پښتونخوا په باجوړ سیمه کې د وروستي ترهګریز برید په تړاو یې په اسلام اباد کې د افغانستان د سفارت مرستیال احضار کړی دی. په دغه برید کې ۱۱ پاکستاني سرتېري وژل شوي وو.
د بهرنیو چارو وزارت ویاند، طاهر اندرابي، د پنجشنبې په ورځ وویل چې د افغانستان د ماموریت مرستیال ته یې د فبرورۍ د ۱۶مې نېټې د برید په اړه د کابل حکومت ته (رسمي احتجاج) سپارلی دی.
اندرابي وویل: "پاکستان په کلکه د باجوړ پر پوځي او امنیتي پوستې د موټر بم ځانمرګی برید او ورپسې وسله وال برید غندي، چې د فتنة الخوارج / ټي-ټي-پي له خوا ترسره شو." پاکستاني چارواکي ترهګرو ته د "خوارجو" اصطلاح کاروي.
اسلام اباد خپله "جدي اندېښنه" هم څرګنده کړه چې د تحریک طالبان پاکستان (ټي-ټي-پي) مشران په افغانستان کې دېره دي او له افغان خاورې "په ازاده توګه او له کومې سزا له ډاره پرته فعالیت کوي".
ویاند زیاته کړه: "د افغانستان طالبانو رژیم ته په ډاګه ویل شوي چې پاکستان د خپلو سرتېرو، ملکي وګړو او خاورې د خوندیتوب لپاره د ځواب حق لري او د فتنة الخوارج ډلې اړوند هر 'خارجي' به له منځه وړي، هر چېرې چې وي."
د پاکستان د دې څرګندونو یا د خپل دیپلومات د احضارولو په اړه کابل تر اوسه کوم فوري غبرګون نه دی ښودلی.
د کابل چارواکو په پرله پسې توګه په افغانستان کې د ټي-ټي-پي د شتون خبره رد کړې او ویلي یې دي چې هېڅ چا ته به اجازه ورنکړي چې د افغانستان خاوره د پاکستان یا کوم بل هېواد پر ضد وکاروي.
د سه شنبې په ورځ، پاکستاني چارواکو وویل چې په باجوړ کې یو ځانمرګي بریدګر له چاودېدونکو توکو ډک موټر یوې امنیتي پوستې ته نږدې وچاوه، چې له امله یې ۱۱ امنیتي سرتېري او یو ماشوم ووژل شول. امنیتي ځواکونو وروسته له چاودنې ۱۲ ترهګر ووژل.
