د اوربند د ځینو لومړنیو سرغړونو وروسته، د شپې د چاودنو یا توغندیو د بریدونو راپور نه دی ورکړل شوی. د هند پوځ ویلي چې د یکشنبې شپه د وروستیو ورځو په پرتله لومړۍ ارامه شپه وه، که څه هم ځینې ښوونځي لا هم تړلي پاتې دي.
د هند پوځ د یکشنبې په ورځ پاکستان ته د "هاټلاین" پیغام واستاوه چې د تېرې ورځې د اوربند د سرغړونو په اړه یې خبر ورکړ، او د هند د پوځ یوه جګپوړي افسر وویل چې نوي ډیلي د ورته نورو پېښو په وړاندې د ځواب ورکولو نیت څرګند کړی دی.
د پاکستان د پوځ ویاند د هر ډول سرغړونو انکار کړی دی. د شنبې په ورځ، د هند د بهرنیو چارو وزارت په یوه بیان کې وویل چې د دواړو هېوادونو د پوځ د عملیاتو عمومي مشران به د دوشنبې په ورځ د ماسپښین په ۱۲ سره خبرې وکړي.
پاکستان د دې تیلیفوني خبرو په اړه کومه تبصره نه ده کړې.
دواړو سیالانو د یو بل د پوځي تاسیساتو په نښه کولو لپاره توغندي او ډرونونه کارولي، چې په پایله کې لسګونه ملکي وګړي وژل شوي دي. اړیکې هغه وخت خرابې شوې کله چې هند پاکستان په جمو کشمیر کې پر سیلانیانو د برید نه پر ملاتړ تورن کړ .
پاکستان دغه تورونه رد کړي او د یوه بې پرې تحقیقاتو غوښتنه یې کړې ده.
هند ویلي چې د چهارشنبې په ورځ یې په پاکستان او د پاکستان تر ادارې لاندې کشمیر کې د نهه "ترهګریزو زیربناوو" متناسب بریدونه کړي، خو اسلام آباد ویلي چې دا ځایونه ملکي سیمې وې.
اسلام آباد د اوربند په منځګړیتوب کې د واشنګټن مننه کړې او د ټرمپ هغه وړاندیز یې هرکلی کړی چې د هند تر ادارې لاندې د کشمیر په شخړه کې منځګړیتوب وکړي، خو نوي ډیلي د امریکا په ګډون د هر ډول درېیمګړي رول په اړه تبصره نه ده کړې.
هند، چې وایي د پاکستان سره شخړې باید په مستقیم ډول حل شي، د هر ډول درېیمګړي ګډون رد کړی دی.
هندو اکثریت لرونکی هند او مسلمان اکثریت لرونکی پاکستان دواړه د هیمالیا د کشمیر سیمه په بشپړ ډول ادعا کوي، خو یوازې یوه برخه یې اداره کوي.
هند پاکستان د ۱۹۸۹ کال راهیسې د هند تر ادارې لاندې کشمیر کې د یاغیتوب په ملاتړ تورنوي.
