ترکیش ایرلاینز د جمعې په ورځ اعلان وکړ چې د ۷۵ بوینګ B787 ډوله الوتکو فرمایش به ورکړي او د ۱۵۰ ۷۳۷-۸/۱۰ ماکس ډوله الوتکو د پېرودلو په اړه یې خبرې اترې بشپړې کړې دي، خو دا معامله د انجن جوړوونکي شرکت "سي اېف اېم انټرنیشنل" سره د خبرو اترو د پایلې پورې تړلې ده.

د تورکیې د اسهامو بازار "بورسا استانبول" ته په یوه استولې خبرپاڼه کې – چې د اسهامو، پورونو، مشتقاتو او نورو مالي شتمنیو د سوداګرۍ لپاره یو پلیټ فارم دی – ترکیش ایرلاینز وویل، چې له بوینګ څخه یې د ۷۵ B787-9 او B787-10 ډوله الوتکو د پېرودلو پرېکړه کړې ده، چې په دې کې ۵۰ قطعي او ۲۵ اختیاري فرمایشونه شامل دي.

دغه هوايي شرکت وویل، د دې الوتکو د سپارلو نېټه د ۲۰۲۹ او ۲۰۳۴ کلونو ترمنځ ټاکل شوې ده.

د دغو الوتکو د انجنونو، اضافي انجنونو، او د انجن د ساتنې او ترمیم د خدماتو په اړه له رولز رایس او جي اي ایروسپېس شرکتونو سره خبرې اترې روانې دي.

ترکیش ایرلاینز همدارنګه تایید کړه، چې له بوینګ شرکت سره یې د ۱۵۰ نورو ۷۳۷-۸/۱۰ ماکس ډوله الوتکو د پېرودلو په اړه خبرې اترې بشپړې کړې دي، چې په دې کې ۱۰۰ قطعي او ۵۰ اختیاري فرمایشونه شامل دي.

دغه شرکت وویل، د ۷۳۷-۸/۱۰ ماکس الوتکو فرمایشونه به د انجن جوړوونکي شرکت "سي اېف اېم انټرنیشنل" سره د خبرو اترو له بریالۍ پایلې وروسته ورکړل شي.

شرکت زیاته کړه: "د دې فرمایشونو په ورکولو سره، زموږ موخه دا ده چې تر ۲۰۳۵ کال پورې زموږ د الوتکو ټول کاروان له نوي نسل الوتکو څخه جوړ شي، چې په دې توګه به زموږ عملیاتي موثریت پیاوړی او د شاوخوا ۶ سلنې کلنۍ ودې له منځنۍ کچې سره به مرسته وشي."