د اسرائیلي پوځ د ویاندویۍ څانګې یوې پخوانۍ غړې اعتراف کړی چې پوځ په غزه او اشغال شوې لویدیځه غاړه کې د خپلې نسل وژنې جګړې په اړه په حقایقو کې لاسوهنه کړې ده. هغې مطبوعاتو ته د ورکړل شویو معلوماتو په ترتیب او بدلون کې د خپل مستقیم رول جزئیات وړاندې کړي دي.

ایلیت کرایزر وویل چې بې ګناه فلسطینیانو ته به په دوامداره توګه د "ترهګرو" نوم ورکول کېده او رسمي اعلامیې به په قصدي ډول داسې جوړېدې چې کورنی ملاتړ راجلب کړي او د دې نسل وژنې جګړې لپاره نړیوال مشروعیت ترلاسه کړي.

کرایزر دا اعتراف پر ایکس (X) شبکه په یوه عامه بیان کې هغه مهال وکړه، کله چې هغې د "سکوت ماتول" (Breaking the Silence) په نوم د یوه اسرائیلي سازمان د ویاندې په توګه خپله ټاکنه اعلان کړه. دا سازمان په اشغال شویو سیمو کې د پوځي سرغړونو په اړه د پخوانیو سرتېرو شهادتونه (څرګندونې) ثبتوي.

هغې ولیکل: "د خپلې دندې پر مهال، ما رسنیو ته په خپرو شویو معلوماتو کې لاسوهنه کوله. ما ولیدل چې څنګه به حتی پر بې ګناه فلسطینیانو د 'ترهګر' کلمه پورې کېده او څنګه به اعلامیې د ټاکل شویو مخاطبینو او موخو لپاره په ځانګړي ډول جوړېدې."

کرایزر یادونه وکړه چې د هغې دندې نوموړې نه یوازې له ځمکني وضعیت سره مخ کړه، بلکې دا یې هم ورته وښودل چې پوځ څنګه غوښتل دا وضعیت خلکو ته انځور کړي.

هغې د ویاندویۍ پر څانګې تور ولګاوه چې حقایق د یوه دولتي بنسټ پر ځای، د عامه اړیکو د یوه شرکت په څېر اداره کوي.

کله چې به اسرائیلي ټولنې ته معلومات ورکول کېدل، د دې څانګې موخه په وسله والو ځواکونو باور زیاتول و، چیرې چې "د خلکو د خبرېدو حق په ښه حالت کې دویمه درجه ارزښت درلود،" په داسې حال کې چې د بهرنیو اعلامیو موخه د مشروعیت جوړول وو: "دلته هم، د دې کار بیه د حقیقت قرباني کول وو."

هغې څرګنده کړه چې د ډله ییزو تلفاتو اعلانونه به څنګه له معیاري توجیهاتو سره یوځای کېدل: "ما زده کړل چې څنګه په یوه برید کې د لسګونو کسانو د مرګ خبر ورکړم او په اتوماتیک ډول ورسره دا ور اضافه کړم چې موږ هغو خلکو ته پر رسېدلي زیان خواشیني یو چې په جګړه کې ښکېل نه دي.

دا زما د دندې ورځنی کار و... زه هیڅکله د بې عدالتۍ پر وړاندې په چوپ پاتې کېدو کې ښه نه وم، مګر دلته له ما څخه غوښتل کېدل چې د بې عدالتۍ لپاره تبلیغات  وکړم."

کرایزر، چې په یوه سخته مذهبي (الټرا اورتودوکس) ټولنه کې لویه شوې، درې کاله وړاندې له پوځي خدمت څخه خپله معافیت لغوه کړ ترڅو د جګړې پر مهال پوځ ته لاړه شي، ځکه هغې باور درلود چې د خپل هېواد دفاع کوي.

هغې پر نورو پخوانیو سرتېرو غږ وکړ چې خبرې وکړي او ویې لیکل: "که تاسو د جګړې پر مهال دنده ترسره کړې وي، تاسو هم چوپ مه پاتې کېږئ."

د ۲۰۲۳ کال له اکتوبر راهیسې، پر غزې د اسرائیلو د نسل وژنې جګړې له ۷۴,۰۰۰ ډېر فلسطینیان وژلي، تر ۱۷۵,۰۰۰ ډېر یې ټپیان کړي او شاوخوا ۹۰ سلنه ملکي بنسټونه یې ویجاړ کړي دي.