د «جیو نیوز» د خبر له مخې، د پاکستان د وسلهوالو ځواکونو د عامه اړیکو ادارې په بلوچستان او خیبر پښتونخوا ایالتونو کې د امنیتي ځواکونو له خوا د ترسره شویو ګڼو عملیاتو په اړه یوه اعلامیه خپره کړې ده.
په اعلامیه کې راغلي چې امنیتي ځواکونو د نوامبر له ۳مې راهیسې د کوټې ښار په کورمه (Kurram) سیمه او د خیبر پښتونخوا په میرعلي او اورکزیو سیمو کې د عملیاتو په ترڅ کې ۷۴ وسلهوال وژلي دي.
په اعلامیه کې یادونه شوې چې په دغو عملیاتو کې د لاسي جوړو شویو ماینونو په ګډون په زیاته کچه وسلې، مهمات او چاودېدونکي توکي نیول شوي دي او زیاته شوې: «په دغو استخباراتي عملیاتو کې د ترهګرو پر ګڼو پټنځایونو اغېزمن بریدونه ترسره شول.»
په پاکستان کې د ترهګرۍ ستونزه
په پاکستان کې وسلهوال بریدونه په ځانګړي ډول له افغانستان سره پر پوله پرتو خیبر پښتونخوا او بلوچستان ایالتونو کې متمرکز دي.
په دواړو ایالتونو کې هغه وسلهوالې ډلې چې ادعا کوي د پښتنو او بلوڅو قومي ډلو له حقونو دفاع کوي، پر پاکستاني امنیتي ځواکونو او ملکي وګړو بریدونه کوي.
په داسې حال کې چې اسلاماباد ادعا کوي چې تحریک طالبان پاکستان (TTP) په افغانستان کې ځای پر ځای دي او خپل بریدونه له هغه ځایه تنظیموي، خو د افغانستان حکومت دا ادعاوې ردوي.
بلخوا، په بلوچستان کې بیا د «بلوچستان د آزادۍ پوځ» (BLA) بریدونه ډېر تر سترګو کېږي. دغه ډله له پاکستان څخه د بلوچستان د بېلېدو او پر دې سیمه د بلوڅ ولس د واکمنۍ غوښتنه کوي.
