تیکا په افغانستان کې د اورېدو ستونزې لرونکو زدهکوونکو لپاره د غږیزو ځانګړتیاوو لرونکي ټولګي جوړ کړل
د تورکیې د همکارۍ او همغږۍ ادارې (تیکا) په افغانستان کې د اورېدو ستونزې لرونکو وګړو د زده کړو د ملاتړ په موخه د کابل د کڼو په انسټیټیوټ کې ځانګړي ډیزاین شوي ټولګي جوړ کړل.
د تورکیې د همکارۍ او همغږۍ ادارې ( تیکا ) له خوا په خپره شوې خبرپاڼه کې راغلي، چې د افغانستان په پلازمېنه کابل کې د کابل د کڼو انسټیټیوټ په چوکاټ کې د اورېدو ستونزې لرونکو وګړو د زده کړو لپاره څلور ځانګړي ډیزاین شوي ټولګي د تیکا له خوا ګټې اخیستنې ته وسپارل شول.
دا ټولګي په غږیزو ځانګړتیاوو (اکوستیک) سمبال شوي، ترڅو هغه زدهکوونکي چې د اورېدو ستونزه یې په بېلابېلو کچو کې ده، وکولای شي د اورېدو عادي شرایطو ته په تر ټولو نږدې چاپیریال کې زده کړې وکړي.
په ټولګیو کې د ښوونکو او زدهکوونکو ترمنځ د اړیکو اسانولو لپاره د غږ ضد (عایق) لوړ کیفیت لرونکي توکي کارول شوي دي.
د اورېدو ستونزې لرونکو وګړو د لیدیزې (بصري) زده کړې تمایل ته په پام سره، ټولګي په بېلابېلو ډیجیټلي او غیر ډیجیټلي لیدیزو ښوونیزو توکو سمبال شوي دي.
د دې لپاره چې زدهکوونکي له خپلو ښوونکو سره اغېزمنې اړیکې ټینګې کړي، د اورېدو ځانګړي وسایل برابر شوي او د زده کړو په بهیر کې د اړتیا وړ ټول وسایل، توکي او تخنیکي تجهیزات انسټیټیوټ ته سپارل شوي دي.
د ټولګیو د پرانیستې په مراسمو کې په کابل کې د تورکیې سفارت شارژدافیر او د ماموریت مشر جنک اونال، د تیکا د کابل همغږي کوونکی فاضل اکین اردوغان، د افغانستان د تخنیکي او مسلکي زده کړو ادارې مرستیال فضل الرحمن فاضل او ګڼ شمېر نورو مېلمنو او زدهکوونکو ګډون کړی و.
اونال په خپله وینا کې وویل: "د انسانانو لپاره رښتینی خنډ نشته، بلکې یوازې داسې ماشومان او ځوانان شته چې پوره ملاتړ یې نه دی شوی، تر شا یې څوک نه دي درېدلي او ځان ښودلو ته یې فرصت نه دی ورکړل شوی." اونال زیاته کړه چې تیکا په افغانستان کې خپلې پروژې په همدې لیدلوري پرمخ بیايي.
د تیکا د کابل همغږي کوونکي اردوغان هم وویل چې د تورکیې او افغانستان ترمنځ ژورې ورورولۍ اړیکې نږدې یوه پېړۍ تاریخ لري او د تیکا له خوا هره پلي شوې پروژه يې "د دواړو هېوادونو ترمنځ د دوستۍ پر پله يوه نوې اېښودل شوې خښته" وبلله.
د مراسمو په ترڅ کې د انسټیټیوټ د زدهکوونکو د نقاشۍ، خطاطۍ او اسلامي اثارو نندارتون هم پرانیستل شو.
