په افغانستان کې د ملګرو ملتونو مرستندویه پلاوي (یوناما) د دوشنبې په ورځ وویل چې "داسې باوري راپورونه" یې ترلاسه کړي چې د افغانستان په خاوره کې د پاکستان د شپې په هوايي بریدونو کې لږ تر لږه ۱۳ ملکي وګړي وژل شوي او اووه نور ټپیان دي.
یوناما ویلي، چې دغه مرګ ژوبله چې ښځې او ماشومان هم په کې شامل دي، د ننګرهار په ولایت کې اوښتې ده.
د ملګرو ملتونو د ماموریت په وینا، په پکتیکا ولایت کې، بریدونو یوه مدرسه په نښه کړې او یو جومات او یو کور یې هم قسمي زیانمن کړي، خو زیاته یې کړه چې له هغه ځایه سمدستي د ملکي مرګ ژوبلې راپور نه دی ورکړل شوی.
د ملګرو ملتونو ماموریت پر دواړو غاړو غږ وکړ چې دښمني پای ته ورسوي او د ملکي وګړو د ساتنې لپاره ټول تدابیر ونیسي.
پاکستاني جټ الوتکو د یکشنبې په لومړیو کې د افغانستان په ختیځ او سوېل ختیځ کې هوايي بریدونه ترسره کړل، چې اسلام اباد یې د اورپکو پټنځایونه بولي.
افغان چارواکو ادعا وکړه چې په بریدونو کې ملکي وګړي وژل شوي او د غچ اخیستنې ژمنه یې وکړه.
د پاکستان د کورنیو چارو مرستیال وزیر، طلال چوهدري، ځایي ټلویزیون جیو نیوز ته وویل چې د لومړنیو راپورونو له مخې لږ تر لږه ۷۰ "ترهګر" وژل شوي دي.
د افغانستان د دفاع وزارت ویاند، عنایت الله خوارزمي، او د حکومت ویاند، ذبیح الله مجاهد، بیا ادعا وکړه چې په بریدونو کې لسګونه ښځې او ماشومان وژل شوي او ټپیان شوي دي.
پاکستان په وروستیو کلونو کې د اورپکو د تاوتریخوالي له زیاتوالي سره مخ دی، چې ډیری پړه یې پر پاکستاني طالبانو او بلوڅ بېلتون غوښتونکو ډلو اچول کیږي.
اسلام اباد پر پاکستاني طالبانو تور لګوي چې له افغانستان څخه فعالیت کوي، دا هغه تور دی چې په کابل کې د طالبانو په مشرۍ حکومت په وار وار رد کړی دی.
د دواړو ګاونډیو هېوادونو ترمنځ اړیکې د تېر اکتوبر د خونړیو نښتو راهیسې ترینګلې پاتې دي. د قطر په منځګړیتوب یو اوربند تر ډېره حده ټینګ پاتې شو، خو په استانبول کې ورپسې خبرو کومه رسمي موافقه رامنځته نه کړه.
