فیدان: تورکیې د ایران د جګړې پای ته رسولو لپاره ډیپلوماسي ګړندۍ کړې ده

د تورکیې بهرنیو چارو وزیر هاکان فیدان وايي، تورکیه په ایران کې د کورنۍ جګړې د راپارولو له هڅو سره مخالفت کوي او خبرداری ورکوي چې دا به یوه "تاریخي" تېروتنه وي.

د تورکیې د بهرنیو چارو وزیر هاکان فیدان د شنبې په ورځ وویل، ترکیه د امریکا، اسرائیلو او ایران ترمنځ د جګړې پای ته رسولو کې د مرستې لپاره خپلو ډیپلوماټیکو اړیکو ته دوام ورکوي.

فیدان چې د تورکي دولتونو د سازمان د بهرنیو چارو وزیرانو شورا له یوې غیر رسمي غونډې وروسته خبرې کولې، وویل: "د ښاغلي پزشکیان څرګندونې، چې 'موږ به برید ونه کړو ترڅو چې برید راباندې ونه شي. موږ د برید کولو له امله بخښنه غواړو' یوه داسې بیانیه ده چې موږ پرې ټینګار کړی دی."

هغه زیاته کړه: "زه غواړم یو ځل بیا ټینګار وکړم چې موږ پر درېیمو هېوادونو بریدونه په کلکه غندو."

فیدان د تورکیې اړوند امنیتي اندیښنو ته هم اشاره وکړه او تهران ته یې د تورکیې خاورې ته د توغندیو د توغولو د هر ډول هڅو په اړه خبرداری ورکړ، دا خبرداری څو ورځې وروسته له هغه ورکړل شو چې ناټو له ایران څخه توغول شوی او د تورکیې په لور روان یو بالستیک توغندی ونیو.

د بهرنیو چارو وزیر هاکان فیدان په استانبول کې خبریالانو ته وویل: "موږ هغه هېواد نه یو چې په اسانۍ سره راوپارول شي."

"موږ په ایران کې له خپلو ملګرو سره خبرې وکړې او ورته ومو ویل چې که دا یو توغندی و چې خپله لار یې ورکه کړې وه، دا یوه خبره ده. خو که دا لړۍ دوام ومومي، زموږ مشوره دا ده: محتاط اوسئ؛ په ایران کې هیچا ته اجازه مه ورکوئ چې دا ډول ماجرا پیل کړي."

د تورکیې د بهرنیو چارو وزیر همدارنګه د رژیم د بدلون په موخه په ایران کې د کورنۍ جګړې د راپارولو د هڅو په اړه خبرداری ورکړ او ویې ویل چې دا به یوه "تاریخي" تېروتنه وي.

د بهرنیو چارو وزیر هاکان فیدان خبرداری ورکړ: "موږ د هغو ټولو سناریوګانو پر ضد یو چې د قومي یا مذهبي اختلافاتو په نښه کولو سره په ایران کې د کورنۍ جګړې د رامنځته کولو هڅه کوي. دا تر ټولو خطرناکه سناریو ده."