د ایران سپاه پاسداران وايي، تهران لا تر اوسه د خپلو دښمنانو په وړاندې له خپلو ټولو وړتیاوو څخه کار نه دی اخیستی.
د ایران سپاه پاسداران د چهارشنبې په ورځ خبرداری ورکړ چې د امریکا او اسرائیلو هر ډول نوی برید کولی شي یوه داسې پراخه جګړه پیل کړي چې له سیمې بهر هم وغځیږي.
د تسنیم خبري اژانس لخوا په خپره شوې اعلامیه کې، سپاه پاسداران ویلي چې امریکا او اسرائیل د هغو پرله پسې «ستراتیژیکو ماتو» څخه په درس اخیستلو کې پاتې راغلي چې د ایران په وړاندې ورسره مخ شوي وو.
دې ځواک ادعا کړې چې د «نړۍ د دوو تر ټولو ګرانو پوځونو د ټولو وړتیاوو» په کارولو سره د بریدونو سره سره، ایران لا تر اوسه د خپلو دښمنانو په وړاندې خپلې ټولې وړتیاوې نه دي کارولې.
په اعلامیه کې ویل شوي: «که پر ایران تېری تکرار شي، هغه سیمه ییزه جګړه چې ژمنه یې شوې وه، دا ځل به له سیمې بهر هم خپره شي.»
سپاه پاسداران همدارنګه په داسې ځایونو کې د «ځپونکو ګوزارونو» خبرداری ورکړ چې «تاسو یې تصور هم نه شئ کولی.» په اعلامیه کې زیاته شوې: «موږ د جګړې سړي یو، او تاسو به زموږ ځواک د جګړې په ډګر کې وګورئ، نه په خالي بیانونو او مجازي پاڼو کې.»
د امریکا ولسمشر ډونالډ ټرمپ د دوشنبې په ورځ وویل چې د خلیج د هېوادونو د مشرانو په غوښتنه یې پر ایران برید ځنډولی دی. بلخوا، پاکستان ویلي چې د ایران او امریکا ترمنځ د ځنډېدلې ډیپلوماسۍ د بیا ژوندي کولو لپاره کار کوي؛ دا هڅې د اپریل په ۸مه د پاکستان په منځګړیتوب د شوي اوربند له هوکړې وروسته پیل شوې دي.
امریکا او اسرائیلو د فبرورۍ په ۲۸مه پر ایران بریدونه وکړل، چې ورسره سم تهران په سیمه کې پر اسرائیلو او امریکايي ګټو ځوابي بریدونه وکړل او همدارنګه یې د هرمز تنګی وتاړه.
