ایران د نجونو پر ښوونځي برید 'نه بخښونکی جنګي جرم' وباله او د حساب ورکولو غوښتنه یې وکړه
د ایران بهرنیو چارو وزارت ویاند اسماعیل بقايي وايي هغه برید، چې د ایراني چارواکو په وینا ۱۶۸ د ښوونځي ماشومان پکې وژل شوي، باید بې سزا پاتې نه شي.
ایران د فبرورۍ په ۲۸مه د هېواد په سوېلي ښار میناب کې پر یوه ابتدایي ښوونځي د توغندي برید «نه بښونکی» جنګي جرم بللی او غوښتنه یې کړې چې مسؤل کسان دې حساب ورکولو ته کش کړل شي.
د بهرنیو چارو وزارت ویاند اسماعیل بقايي د چهارشنبې په ورځ وویل چې دا برید، چې د ایراني چارواکو په وینا پکې ۱۶۸ د ښوونځي ماشومان وژل شوي، باید بې سزا پاتې نه شي.
بقايي په اېکس کې ولیکل چې د فبرورۍ په ۲۸مه په میناب ښار کې د «امریکايي توماهاک دوه ځله برید کوونکي توغندي» برید «۱۶۸ ایراني کوچنۍ فرښتې ووژلې».
هغه ولیکل: «دا یو نه بښونکی او ډېر دروند جنګي جرم دی چې باید بې سزا پاتې نه شي.»
د ایران دولتي ټلوېزیون مخکې راپور ورکړی و چې دا برید په میناب ښار کې، چې د ایران د هرمزګان ولایت په سوېل کې موقعیت لري، د نجونو پر یوه ابتدایي ښوونځي شوی و. د راپور له مخې، په دغه برید کې له ۱۷۰ څخه زیات کسان ــ چې زده کوونکي او ښوونکي هم پکې شامل دي ــ وژل شوي دي.
د امریکا ولسمشر ډونالډ ټرمپ مخکې ادعا کړې وه چې ممکن ایران د برید تر شا وي، او ویلي یې وو: "د هغه څه پر بنسټ چې ما لیدلي دي، دا د ایران لخوا ترسره شوی دی."
وروسته له هغې چې راپورونه خپاره شول چې په برید کې د ټوماهاک کروز توغندي کارول شوي، چې معمولا د امریکا پوځ لخوا کارول کیږي، ټرمپ پرته له دې چې کوم شواهد وړاندې کړي ادعا وکړه چې ایران ځینې ټوماهاک توغندي لري. دا ادعا وروسته ناسمه ثابته شوه.
د امریکا رسنیو د چهارشنبې په ورځ د روانې پوځي څېړنې د لومړنیو موندنو له مخې راپور ورکړ چې ښايي دا برید د امریکا د پوځ له خوا ترسره شوی وي.
د برید په اړه څېړنې لا هم روانې دي.
