د سوریې د بهرنیو چارو وزیر اسعد الشیباني د سه شنبې په ورځ د سوریې دولتي خبري اژانس (سانا) ته وویل: "موږ د ولسمشر ډونالډ ټرمپ وروستۍ څرګندونې چې د سوریې پر وړاندې لګېدلي بندیزونه لرې کوي، هرکلی کوو. دا بندیزونه د اسد رژیم لخوا د جنګي جرمونو په ځواب کې لګول شوي وو."

الشیباني دا پرېکړه د سوریې خلکو لپاره "یو مهم بدلون" وباله او زیاته یې کړه: "موږ د ثبات، ځان بسیاینې او د کلونو جګړې وروسته د ریښتینې بیا رغونې پر لور روان یو."

هغه زیاته کړه: "موږ دا اعلان په ډېر مثبت نظر ګورو او چمتو یو چې له امریکا سره د متقابل احترام، باور او ګډو ګټو پر بنسټ اړیکې جوړې کړو."

الشیباني وویل چې ټرمپ "د تاریخي سولې تړون د ترلاسه کولو وړتیا لري او د امریکا ګټو لپاره په سوریه کې ریښتینی بری ترلاسه کولی شي." هغه زیاته کړه: "ټرمپ د سوریې خلکو لپاره تر خپلو مخکینیو ولسمشرانو ډېر څه کړي دي، کومو چې جنګي مجرمینو ته اجازه ورکړه چې سرې کرښې ماتې کړي او عام وژنې ترسره کړي."

له دې وړاندې په ریاض کې ټرمپ وویل چې د تورکیې ولسمشر رجب طیب اردوغان او نورو سیمه ییزو مشرانو سره تر سلا مشورو وروسته به پر سوریه لګېدلي "سخت او ځپونکي" بندیزونه لرې کړي.

ټرمپ د سه شنبې په ورځ په ریاض کې د پانګونې په یوه فورم کې وویل: "د سوریې وضعیت سعودي عربستان د  ولیعهد او همدارنګه د تورکیې ولسمشر اردوغان سره تر خبرو وروسته، چې څو ورځې وړاندې یې ما ته ورته غوښتنه وکړه، او د منځني ختیځ د هغو دوستانو سره چې زه یې ډېر درناوی کوم، پرېکړه مې وکړه چې پر سوریه بندیزونه پای ته ورسوم ترڅو هغوی ته د پرمختګ چانس ورکړم."

د "پرمختګ چانس"

ټرمپ د ۲۰۲۵ کال د سعودي-امریکا د پانګونې فورم په ترڅ کې وویل چې هغه به پر سوریه لګېدلي "سخت او ځپونکي" بندیزونه لرې کړي ترڅو دې هېواد ته د پرمختګ چانس ورکړي.

د ټرمپ د دې اعلان وروسته د سوریې په ډیری ښارونو کې، په ځانګړې توګه په پلازمېنه دمشق کې، د خلکو خوشحالۍ او جشنونه ترسره شول.

په همدې حال کې د سوریې ولسمشر احمد الشرع د سه شنبې په ورځ ریاض ته ورسېد، تمه کیږي چې احمد الشرع د ټرمپ سره لیدنه وکړي.

ټرمپ د ورځې په لومړیو کې سعودي عربستان ته ورسېد، چې د خلیج په هېوادونو کې به قطر او متحده عربي اماراتو ته هم سفر وکړي. دا د هغه د دویمې دورې د ولسمشرۍ لومړنی لوی نړیوال سفر دی، پرته له دې چې د پاپ فرانسس د جنازې لپاره ایټالیا ته لنډ سفر کړی و.

د سوریې نوې اداره د نړیوالو او سیمه ییزو پراخو ملاتړ غوښتنه کوي ترڅو هېواد د بشار الاسد د واکمنۍ له میراث څخه راووځي.

د رژیم له پرځېدو وروسته، انتقالي حکومت ټینګار کړی چې موجوده امریکایي او اروپایي اتحادیې بندیزونه د بیا رغونې هڅې خنډوي.

که څه هم امریکا او اروپایي اتحادیې په تېرو کې په ځانګړو برخو کې ځینې بندیزونه نرم کړي دي، خو دا به د ۲۰۱۱ کال راهیسې د لومړي ځل لپاره د بندیزونو بشپړ لرې کول وي.

اسد، چې نږدې ۲۵ کاله یې په سوریه واکمني وکړه، په ډسمبر کې روسیې ته وتښتېد، چې د بعث ګوند د ۱۹۶۳ کال راهیسې د واک اوږدمهاله نیونه پای ته ورسوله.